Den medionan di comunicion a sali cu Gobierno a cumpra incineratornan nobo pa kima sludge, medical waste y carcass, pero preguntanan serio ta keda sin contesta.
Un biaha mas, pueblo di Aruba ta wak con decision gubernamental ta wordo tuma sin e transparencia y dunamento di cuenta cu nos democracia merece. E noticia cu Aruba Wastewater Sustainable Solutions (AWSS) a cumpra incineratornan nobo pa kima sludge, medical waste y carcass di bestia morto, a trece hopi pregunta cu te awo ta keda sin contesta.
Loke ta hasi e situacion aki ainda mas preocupante ta e echo cu, segun informacion disponibel, e incineratornan aki a wordo cumpra for di e mesun compania cu na aña 2017 a bende equipo na Departamento di Obra Publico (DOW). E equipo anterior nunca a cumpli cu su proposito y a resulta den un desaster completo. E incinerator na Parkietenbos, cu mester tabata kima e sludge i Medical Waste, a duna nada mas cu problema i no tawata cumpli cu e demanda.
E pregunta central cu pueblo ta hasi ta simpel: Si e compania cu a bende e prome incineratornan na DOW no a cumpli cu nan obligacion – y pa colmo tabata tin sombra di corupcion rond di e deal anterior – dikon ta bolbe recurri na e mesun compania? Ki tipo di analisis a wordo hasi promer cu tuma e decision aki? A evalua e historial di e compania? A compara ofertanan di otro companianan?
Tabata tin un destaho publico?
Un di e preguntanan mas urgente ta si a conduci un destaho publico (openbare aanbesteding) pa e compra di e incineratornan. Den un proceso transparente, diferente companianan ta presenta nan oferta, y e miho opcion – tanto den prijs como den calidad – ta wordo selecciona. Si no a sigui e procedura aki, e pregunta ta: dikon no? Ki ta e interes pa evita un proceso competitivo y transparente?
Transparencia no ta un luho; ta un obligacion di cualkier gobierno drechi. E placa cu ta wordo usa pa cumpra e incineratornan aki ta sali for di e bolsa di pueblo, ya sea directamente of indirectamente, via e Sustainability Fee di $20 cu cada turista ta paga y cu ta financia AWSS. Cada dolar merece un splicacion cla.
A hasi e analisis necesario?
Otro pregunta importante: a hasi un analisis tecnico exhaustivo promer cu cumpra e incineratornan? A investiga si e machinnan ta adecua pa e trabao cu nan tin di hasi – esta, kima sludge, medical waste y carcass na un manera sigur, eficiente y den cumplimiento cu normanan ambiental? Kiko ta e “life expectancy” (duracion di bida util) di e machinnan? Tin garantia? Ki ta e costonan di mantencion?
E pregunta di millon: Pa kiko tin tanto medical waste?
Esaki ta kizas e pregunta mas revelador di tur: Pa kiko tin tanto medical waste acumula na e momentonan aki? E incinerator cu DOW a cumpra e tempo ey tabata tin como exigencia specifico pa deshasi di medical waste. Esey tabata parti di e deal, tabata e motibo principal pa e compra. Y awor, añanan despues, nos ta descubri cu absolutamente NADA a pasa. E medical waste no a wordo elimina. E incinerator a fracasa y e medical waste a keda acumula.
Y e prueba di e fracaso ta na bista di tur hende: mas di 40 container jena cu medical waste ta para ei, como un monumento di negligencia, mal maneho y falta di cumplimiento.
Laga e cifra ey sink in. Esey no ta un “pequeño inconveniente” of un “retraso tecnico.” Esey ta un crisis ambiental y di salud publica cu a wordo permiti pa aña tras di aña, bou di wowonan di esnan cu mester tabata vigilando.
Y awor, pa colmo di insulto, Gobierno ta bay den boda cu e mesun compania cu a bende e incinerator cu a fracasa. E mesun compania cu no a cumpli. E mesun compania cu a laga nos cu 40-y-pico container di medical waste sin procesa. Esaki no ta progreso – esaki ta un burla na cara di pueblo. Ta manera si e pasado no a pasa, manera si e fracaso no tabata real, manera si e containernan ey ta invisibel.
E existencia di e 40-plus container di medical waste ta e evidencia mas cla cu por existi cu e prome compra a faya completamente.Y si e prome compra a faya, ki garantia pueblo tin cu e di dos lo ta diferente? Especialmente ora ta e mesun compania? E carga di prueba ta riba Gobierno y AWSS pa demostra pueblo dikon e biaha aki lo ta diferente. Sin esey, nos ta simplemente tirando placa den un buraco sin fondo.
Pueblo no por sigui paga pa fechorianan.
E ora a yega pa exigi responsabilida.Un pueblo no por keda pagando pa decisionnan malo, pa compra cu ta beneficia un grupo chikito y no e comunidad en general. E turista cu ta paga e Sustainability Fee tin derecho di sabi cu nan placa ta wordo inverti cu sabiduria y transparencia. E ciudadano Arubano tin derecho di exigi cu su gobierno ta opera na un nivel di integridad cu inspira confiansa.
Ta tempo pa mara man di tur esnan cu ta responsabel – politikonan y tur esnan cu ta complise – y exigi respuesta cla. Ki compania a wordo selecciona? Pa ki monto? Riba ki base? Tabata tin un destaho? Ki ta e garantianan? Ki ta e track record di e suplidor?
Si e contestanan no bin, si e silencio continua, e pueblo di Aruba tin e derecho y e deber pa sigui presiona. Pasobra un nacion cu ta permiti corupcion y mal maneho sin consecuencia, ta un nacion cu ta hinca su mes den un buraco unda solamente e generacionnan venidero lo carga e peso.
