Nos Enfermera y enfermero nan ta nos futuro: Cuida enfermera y enfermero nan ta fortalece economia.
International Counsel of Nurses (ICN) e aña aki a scohe como tema pa Dia Internacional di Enfermeronan : “Nos Enfermeronan. Nos Futuro. Cuida enfermeronan ta fortalese economia.”
E tema di 2025 ta focus riba e salud y bienestar di e enfermeronan. E tema aki ta pa nos para un rato keto y reflexiona ariba e rol crucial cu un enfermera of enfermero tin den duna cuido, pa salud publico.
E importancia pa un enfermera y enfermero ta den bon estado di salud pa por fortalese economia, mehora sistema nan di salud cu lo sigura un miho cuido pa tur hende nos comunidad.
Enfermeria ta enfrenta hopi reto: físiko, mental, emocional, etico y ta importante pa nos atende e retonan aki di un manera cu ta promove salud di e enfermeronan cu na su turno lo refleha den e cuido cu ta duna na bienestar di salud general di nos comunidad. E tema aki ta habri caminda pa dialogo pa hunto trece solucion pa cada situacion. Solucionan cu lo sostene e enfermeronan den nan trabou diario y mehora nan area di trabao ariba termino largo. Esaki lo reforsa tur e “stakeholders” den enfermeria principalmente gobierno y AZV pa balora, proteha, respeta y inverti den nos enfermeronan pa un futuro sostenibel pa enfermeria y salubridad publico di nos pais.
Dia 12 di mei proximo ICN lo publica nan raport cu lo focus riba solucionnan basa riba evidencia pa mehora e salud y bienestar di enfermeronan, reconociendo nan rol crucial den optimalisa tantu sistema nan di salud como economia. E lo trata precupacion nan clave manera salud mental, bienestar físico y siguridad na luga di trabou, ofreciendo strategianan cu por wordu implementa pa sostene enfermeronan den e areanan critico aki. Ademas e raport lo boga pa crea ambiente di trabou mas sigur, cu mas apoyo pa tin mas inclucion di diferente cultura cu ta traha hunto cu mesun meta, sigura un miho acceso y calidad di cuido pa e pashent, retencion mas haltu di personal y un sistema di salud mas fuerte cu lo beneficia comunidad den su totalidad. E ta stimula pa atende e raisnan cu ta debilita e bienestar di enfermeronan pa fortifica un personal di enfermeria saludable.
ODEA ta trahando hopi serca cu “kwaliteitsinstituut” pa sigura cu cada enfermera y enfermero na Aruba, no obstante cua instituto nan ta traha, cua specialisacion e enfermera y enfermero tin, por tin e seguridad cu tur por keda mantene nan acreditacion local y international. Pa esaki tur stakeholders ta trahando hunto pa brinda e oportunidad na un y tur den enfermeria por keda educa su mes na un manera mas economico cu lo benificia enfermeria na Aruba.
ODEA ta desea e Raad van toezicht di Kwaliteitsinstituut hopi exito cu nan tarea y cu hunto nos lo controla y eleva salubridad publico na e nivel cu nos tur ta desea pa cada cuidadano di Aruba.
ODEA ta stimula tur enfermera y enfermero pa atende y disfruta di cada actividad cu institutonan a organisa specialmente pa e siman di enfermeria y comunidad esaki ta e siman cu comunidad por demostra cuanto nan ta aprecia enfermera y enfermeronan cu ta duna e cuido den tur nos institutonan, cas di cuidonan, cuido na cas, sector priva, educacion y tur e otro areanan cu tin enfermeronan ta traha na Aruba.
ODEA ta invita tur hoben y adulto cu ta sinti nan mes yama pa duna cuido pa atende e ultimo anochi di informacion di Colegio EPI pa e aña escolar aki dia 27 di Mei 2025 pa inscribi nan mes pa e opleidingnan di “Verzorgende IG” of “Verpleegkunde” pa asina bo tambe por cuminsa bo estudio pa bira un enfermera of enfermero. Nunca ta laat pa studia. Colegio EPI ta pa tur hoiben y adulto cu ta desea di inverti dne su mes y studia pa bira un profesional, pa studia pa bira un enfermera of enfermero. Aruba mescos cu henter mundo tin un scarcedad di enfermera y enfermeronan diploma pa duna cuido. Si bo ta un studiante cu ta cabando bo Havo y te desea di studia pa bira un enfermera of enfermero, inscirbi bo mes na Xavier Univertity pa bo studia bira enfermera of enfermero.
Cu introducion di AruBig tur hende cu ta duna cuido mester ta registra pa por haci e technica reserva cu un enfermera of enfermero cualifica so mag eherce. Enfermeria ta un educacion pa bida largo cu ta forma bo como persona. Si bo persona ta sinti cu bo tin curason pa duna cuido. Aruba mester di bo persona pa educa bo mes pa por duna cuido.
Un NNW 2025 educativo, reflectivo y sociaal cu hopi ambiente pa nos tur enfermeronan y tur cu ta traha den enfermeria.
