Mundo ta yena cu odio, y bo ta mire aunke cuanto hende kier sconde nan odio, toch e ta sali dilanti, pasobra dilanti di Dios nada ta keda scondi.
Ta ora algo sosode nos ta mira cuanto hende ta odia, y cuanto ta stima, cuanto ta pordona, cuanto kier duna un oportunidad pa cuminsa di nobo, cuanto ta declara hende morto na bida, pasobra pa medio di palabra expresa curason ta papia.
Proverbionan 10:12 ta bisa: Odio ta lanta pleito , ma amor ta tapa tur pica.
Esun cu ta odia su ruman no conoce Dios, pasobra Dios ta amor, esun cu no kier pordona su ruman, su relacion cu Dios ta kibra, aunke bo tin rason Dios ta bisa pa bo pordona.
Esun cu sconde odio tin lipnan mentiroso, y esun cu plama calumnia ta un bobo. ( Proverbionan 10:18).
Ken cu ta odio su ruman ta un matado, y boso sa cu ningun matado, no tin bida eterno ta permnece den dje.(1 Juan 3:15)
Ta un trend pa nos tende hende bisa cuanto nan ta odia cierto hende, y hasta nan ta odia hende pa cosnan bon cu nan ta haci, pa motibo di envidia, pasobra envidia ta lanta odio.
Bo ta tende un hoben ta bisa cuanto e ta odia su school caminda e mester bay pa e sinja algo pa bida.
Un hoben ta bisa cu e ta odia polis, caba e polis no a hacie nada, ta simplemente e hoben ta asina rebelde cu e no por soporta caminda tin orden y respet.
Awendia pa cualkier motibo bo ta tende e expresion di odio, y bo ta mira den un hende su cara cu odio ta wordo expresa, y esey ta peligroso pasobra odio ta pica.
Pero nos mester tene cuenta cu mester stima otro pasobra Dios a stima nos prome.E a duna su Yiu unigenito pa ken cu kere den dje no bay perdi ma tin bida eterna.
Yui chikitonan no laga nos stima cu palabra ni cu lenga, ma cu hecho y cu berdad.
Wak con pa siglonan largo e diabel a sembra odio entre nacion cu nacion, pais cu pais,ruman cu ruman, division tur caminda, pasobra esey ta su naturalesa, pa horta, pa mata y pa destrui.
Odio ta trece desorden, caminda tin odio no tin confiansa, tampoco respet, y con cu hende purba tapa cu smile , cara bunita, y hipocresia, toch odio ta sali dilanti y pone cara di hende na berguensa.
Odio nunca por vence amor, pasobra amor ta bini di Dios, y amor ta puro santo y berdadero, amor semper lo sali pa dilanti hunto cu husticia di Dios.
No laga malo vence bo, ma mas bien vense malo cu bon,( Romanonan 12:21).
Ta tempo pa cada mayor lanta riba , y stop di usa expresion cu ta trece odio den cas, pasobra odio ta trece rebeldia den cas y ora e odio ey sali for di cas, e por causa danjo na hende, pasobra odio por haci tur sorto di cos stranjo.
Awor Dios ta manda nos stima nos prohimo manera nos mes, trata tur hende bon, respeta tur hende , no ta importa ken e persona ta , sea e ta rico of pober , gordo of flaco, nos respet semper mester tey.
Esun cu ta bisa cu e ta den lus y sinembargo ta odia su ruman ta den scuridad ainda. Esun cu ta stima su ruman ta permanece den lus, y no tin motibo den dje pa trompica.ma esun cu ta odia su ruman ta den scuridad y no sabi na unda e ta bay.( 1 Juan 2:9-11)
Sinceramente, Pastor Marcel Balootje
