Ministerio Publico a tuma nota di un conferencia di prensa cu a wordo duna awe, unda tres persona a hiba palabra den nomber di un sospechoso cu ta wordo persigui actualmente pa homicidio y intento di homicidio.
Durante e conferencia di prensa aki e hendenan a bisa varios cos tocante con e caso penal ta bayendo y e representacion legal di e sospechoso.
Ministerio Publico ta considera importante pa coregi e cosnan cu a wordo bisa y pa duna e informacion corecto.
E sospechoso ta wordo persigui pa un accidente di trafico cu a sucede riba 5 di januari 2026 riba brug di Renaissance, caminda dos persona a perde nan bida.
Desde e momento cu el a wordo deteni, e sospechoso tabatin un abogado di su mes escogencia (abogado nr. 1). Despues el a agrega un otro abogado (abogado nr. 2) na su defensa y mas despues un tercer abogado (abogado nr. 3).
Tur tres abogado cu a wordo escogi pa e sospechoso, ta inscribi na Corte Comun di Husticia manera ley ta prescribi.
Peticion pa un abogado cu no ta inscribi
E sospechoso a pidi recientemente pa permiti un otro abogado (abogado nr. 4), kende no ta inscribi na Corte Comun di Husticia, pa actua bao responsabilidad di e di ultimo abogado cu a presenta su mes (abogado nr. 3).
Ta Corte Comun di Husticia mester dicidi riba e tipo di peticionnan aki y esey tabata planea pa 16 di juni 2026.
Retiro di defensa
Sinembargo, un dia prome, riba 15 di juni 2026, e dos prome abogadonan (abogado nr. 1 y 2) a informa Ministerio Publico den carta cu nan a tuma nan retiro for di e caso riba 12 di juni 2026 caba.
Djey a sigui retiro di e di tres abogado (abogado nr. 3), kende a informa Ministerio Publico riba 17 di juni 2026 por escrito cu e ta distancia su mes inmediatamente di e caso.
Debi na e serie di retiro consecutivo di tur e abogadonan, e sospechoso a keda sin abogado na e momento ey. Ministerio Publico a pone decano di Ordo di Abogado directamente na haltura di e situacion indeseabel aki.
Decision di Corte Comun di Husticia
Riba 22 di juni 2026 Corte Comun di Husticia a rechasa e peticion di e sospechoso pa permiti un abogado cu no ta inscribi (abogado nr. 4).
Esey pa motibo cu Corte Comun di Husticia no ta considera cu ta trata aki di un caso βparticularβ manera legislador tabata kier meen ora a skirbi ley.
Segun Corte Comun di Husticia, tin suficiente abogado cu experiencia y competencia inscribi cu por defende e sospechoso aki.
Ministerio Publico ta enfatisa cu e sospechoso tin derecho na un bon representacion legal y cu e derecho aki mester wordo garantisa dentro di marco di ley valido.
Ministerio Publico ta sigui traha pa e proceso penal cana cuidadosamente, y cu respet pa derechonan di tur esnan envolvi den e caso y di comunidad den su totalidad.
