Pa cuminsa ta bon den corto analisa loke a pasa na Venezuela e ultimo 5 anjanan.
Prome e Sancionnan contra Venezuela, pa motibo di un gobierno cu no ta bay na amen di Merca, sancionnan y boicot a ser imponi, cualnan ta causando problemanan grandi na e momento aki.
Hopi Venezolano ta sobrevivi den formanan difícil, e boycot a trece scarcedad grandi di hopi articulonan di primera necesidad y tambe di remedinan. E sancionnan ta pone hopi pa busca moda di bandona e país sin tene cuenta cu e riesgonan.
E sancionnan ta ilegal di acuerdo convenionan y leynan internacional.Banconan internacional cu haci comercio cu Venezuela ta wordo penalisa severamente pa USA y e otro paisnan di Nato. Entrada di Venezuela a baha drasticamente.
Pakico e problema na Venezuela.
John Bolton e ministro di seguridad di gobierno di US, dia 29 januari 2019 na Fox Channel a expresa esaki bon cla y e rason pakico tambe nan ta bringando e gobierno di Venezuela.
E a bisa cu nan ta papiando cu e principal companianan Estadounidense pa nan bay produci e petroli Venezolano. Bolton ta ripiti cu derocamento di e gobierno di Maduro lo trece un oportunidad pa empresanan Mericano.
Bolton a bisa tambe cu e petroli den suelo di Venezuela, tur ta pertenece na “Merca” y Maduro mester ser hala un banda.
E declaración aki di Bolton ta bisa tur cos den e problema di Venezuela vs Merca.
Pues e sancionnan ta un arma di guera pa purba logra un cambio di gobierno dor di pone e pueblo sufri, laga pueblo pasa den miseria cu e meta pa baha e gobierno. Hunto cu esaki ta traha un Guaido of otro marioneta kende lo cumpli cu tur deseonan di Merca.
Maduro ta legalmente eligi presidente di Venezuela.
Na 2016 tabatin un acuerdo pa busca un salida pa e problema na Venezuela. Entre Gobierno di Venezuela y Oposición, na Rep Dominicano, bao auspicio di Zapatero, exprome ministro di Spaña. A yega na un acuerdo pa elección adelanta. Dia 7 februari 2018 tabata e dia grandi pa firma e acuerdo, pero oposicion no a presenta pa firma e acuerdo. Ta ser bisa cu gobierno di USA a forsa nan pa no firma. Gobierno di Venezuela a dal bay cu e acuerdo di elección adelanta, parti di oposición a bay elección (Henri Falcon) y Maduro a keda eligi como presidente. USA, ni EU a reconoce e eleccion. Pues ta mantene e sancionnan.
Partidonan di oposicion derechista y radical no a reconoce e reeleccion di Maduro.
Ariba un plasa na Caracas den presencia di algun cien hende Guaido na januari 2019, a autoproclama su mes como presidente di Venezuela, maske 81% di Venezolanonan nunca a tende di dje. Merca mesora a reconoce Guaido, igualmente Europa Uni y algun paisnan mas, total + 55 pais a sigui e politica Mericano.
Guaido a pidi Militarnan Venzolano pa boltea y bini na su banda. A reparti miles di pamfleta na militarnan pa nan boltea y laga Maduro un banda, pero nada.
Guaido a manda un peticion na UN pa accionnan di ayudo humanitario na Venezuela. E a ricibi un contesta di Secretario General cu UN ta coopera solamente cu e gobierno reconoci di Venezuela y dirigi pa Presidente Maduro.
Importante pa menciona cu e lidernan di e bloki di 4G, Guaido dilanti, tur a pidi pa boycotea y sanciona Venezuela di 2018 pa 2020.
E sancionnan ta severo.
Citgo, un compañía Venezolano na USA no por manda su ganashi (normalmente + 7.000 miyon pa anja) pa Venezuela. Venezuela no por bende su petroli.
Consecuencia di tur esaki ta miseria, hamber, falta di remedi, desesperacion y hopi cosnan malo, hasta morto.
Venezuela ta reclama su oro 31 ton (Balor banda di $ 2. biyon) deposita na BoE (Bank of England), pa cumpra remedi pa combati covid, Inglatera ta rechasa e demanda aki.
Diferente ciudadnan brazileiro fronterizo cu Venezuela tabata cumpra coriente for di Venezuela, pero Banconan cu miedo pa sancionnan no ta cumpli cu e pagonan.
E sancionnan y boicot mericano y di EU ta pushando Venezuela den scochi di Russia y China.
Despues di e elección unda Maduro a ser eligi como Presidente di Venezuela, hopi ta e dealnan di Venezuela cu China y Russia. Dealnan cu gobierno Maduro a firma cu Russia e mayor productor di petroli na mundo, acuerdonan pa produci oro y otro mineral presioso, cualnan ta na gran cantidad den suelo Venezolano y Russia ta experto ariba e tereno aki.
E perdidanan dor di e sancionnan mericano ta ser calcula na 136.000 miyon di dólar.
Gobierno di Venezuela ta calcula cu 136.000 miyon di dólar, e sancionnan di merca a causa Venezuela. Esaki ta basa ariba activanan y depositonan den banconan stranhero di companianan venezolano. Merca cu un movecion stranjo a coy Citgo y pase pa e gruponan rond di Guaido na Merca. Citgo ta un filial di PDVSA, e companía estatal Venezolano, na USA, na cual país PDVSA/Citgo tin 3 refinaderia y ta sumistra como 8.000 gas-stations.
Cu e suma di 136 biyon dólar, Venezuela por cumpra cuminda, remedi, simiya y otro productonan pa agricultura, tecnología, articulonan di consumo y otro articulonan necesario pa pueblo, durante hopi aña.
Sancionnan di Merca tin repercussion pa hopi pais, Aruba a haya skop.
E sancionnan a percura cu e deal di Citgo a yega su fin y na Corsow a sera e refinaderia di PDVSA. Merca den un forma unico por bisa a nacionalisa Citgo y pasa Citgo den man di hendenan rond di Guaido. Nos prome Ministro a bisa na 2019, tocante e refinaderia na Aruba, cu Citgo su plan awor ta di “wind down”= baha actividadnan completo y bay di Aruba, cual mester ser mira como cu Guaido y Trump cada un a dal Aruba un skop.
Oil Terminal di SABA tambe a sera, igual Bopec na Bonaire. Tambe varios otro Refinaderianan y otro negoshinan den Caribe cu tin di haber cu petroli Venezolano a cera.
Tambe ariba orden di USA y Hulanda (EU), Aruba mester a cera frontera cu Venezuela. Pues lasonan di famia, di hermandad, di amistad tur a ser kibra, hunto cu tur esakinan tur negoshi cu Venezuela a para. Berduranan y frutanan fresco y barata ya no ta yega mas.
Hunto cu e sancionnan, Venezuela a conoce actonan terorista y invasionnan apoya pa oposicion Venezolano for di Colombia, cual pais ta un aliado fuerte di USA.
Anno 2021 hopi cos a cambia.
Prome ta e cambio di president di USA, Trump su hendenan rond di dje ta hendenan di e sector petrolero, mas dilanti mi a splica e motibo y pesey Trump a trece e sancionnan pisa contra Venezuela. Biden ta aparenta pa caba cu e politica di Trump. Pero laga nos wak.
Di dos parce cu politica na Venezuela ta den un proceso di cambio. E normal bieuw unda e partidonan manera Primera Justicia di Enrique Capriles, Ad (Accion Democratico) di Ramos Allup, Nuevo Tiempo di Stalin Gonzales y Voluntad Popular di Leopoldo Lopes y Guaido, awor yama 4G, e unidad di oposicion, tabata critica Maduro pa tur cos malo, awor cu e normal nobo tur a bisa di kier bay a eleccion di 21N (november 2021) y a bay negocia cu gobierno di Maduro na Mexico.
Pues nos tin un normal nobo, tur e lidernan di 4G, den pasado den e epoca di Trump nan tur a pidi pa sancionnan contra Venezuela. Tambe nan tabata envolvi den e diferente plannan terrorista y desestabilizador manera, las guarimbas, el intento de magnicidio del 4 de agosto del 2019, Operación Gedeon, el plan de la Cota 905. Segun nan Maduro ta un autoritario, un dictador, un usurpador cu kende bo no por deal. Tambe cu e CNE, e instituto cu ta dirigi e eleccionnan na Venezuela ta corrupto y hopi mas acusacionnan. Nan a grita eleccion bao Maduro “nunca”, nan no kier reconoce Maduro, pero awe ata nan ey.
Manera e proverbio Venezolano ta bisa “Tanto nadar para morir en la orilla”
E eleccion di 21N ta pa 23 gobernador y 335 Alcalde.
Otro partidonan di oposicion ya na december 2020 a participa na eleccionnan di Asamblea General (parlamento).
E dirigente di e partido AD, Ramos Allup, vocero di G4 ta bisa awor: Oposicion sa cu tin un salida for di situacion actual ta e eleccion di 21N y negocia cu Gobierno Maduro. Tambe e a bisa cu tin hendenanan ta pintando situacionnan ficticio pa Sali for de situacion. Nos mester biba cu e realidad y no kere den fantasia. Un critica dirigi na Guaido, kende apesar cu su partido ta den G4, no ta comparti e opinion di G4, pa negocia na Mexico y bay eleccion 22N.
Dia 31 di augustus ultimo e partidonan di 4G pa medio di nan vocero Ramos Allup a declara oficialmente cu nan ta bay eleccion di N21 bao di e nomber Plataforma Unitaria, hunto cu otro partidonan di oposicion cu ya a bay eleccion na 2020. Nan contricante sigur lo ta el Gran Polo Patriótico Simón Bolívar, consisiendo di PSUV y algun otro partido di Izquierda.
Negociamento na Mexico
Na Mexico dia 13 aug a inicia e negociacionnan durante 3 dia entre Gobierno Maduro y Oposicion den G4. Gobierno su team ta consisiti di 9 persona, di cual presidente di Asamblea general Jorge Rodrigues ta vocero. Pa G4 tambe 9 persona, vocero ta Bleide. Na final di prome encuentro a firma un memorandum cu gobierno y G4 ta reconoce tur e institutonan Venezolano y varios asuntonan mas. Reunionnan a sigui e weekend cu a pasa y a termina ayera cu dos acuerdo di Gobierno y representantenan di G4.
Prome tur a bay di acuerdo pa respalda e derecho Venezolano ariba e teritorio Essequibo cu actualmnte ta forma parti di Guyana y cu tur ta para tras di e acuerdo di Ginebra di 1966 ariba e disputa cu Guyana.
Di dos tur a acoorda cu Venezuela mester recupera cu prioridad e placanan di estado Venezolano ariba cuentanan stranhero, pa uza e recursonan aki den e bataya contra Covid, pa adkeri mas vacuna y pa hinca placa den hospitalnan, fortalece e programanan di alimentacion y di atencion na e pueblo di Venezuela.
Un Hulandes a firma e acuerdonan, den representacion di EU. Pues por spera cu pronto banconan y institutonan financiero di EU lo pasa tur placa di Venezuela blokia, pa e pais Venezuela. Ta di spera cu USA y otro paisnan lo bay haci mescos.
Esaki sigur lo trece un boom economico na Venezuela.
Habrimento di frontera Aruba cu Venezuela.
E acuerdo aki sigur mester ta motibo pa Hulanda y Merca duna OK pa habri frontera cu Venezuela.
Aruba conoce lasonan fuerte cu Venezuela, e ta e pais mas serca di Aruba, cuanto Arubiana(o) no tin sangernan Venezolano. E lasonan di amistad ta fuertisimo.
Nos desaroyo economico y social cu nos conoce awe y a cuminsa mas o menos cien anja pasa, ta gracias na e Petroli Venezolano y inversionnan di Exon, cu e apertura di Lago. Hulanda tabata ausente.
Pues negoshinan cu Venezuela mester briya atrobe, igualmente e turismo Venezolano cu ta bonbini. Berduranan, frutanan fresco y barata ta un necesidad na Aruba.
Cu Venezuela mester yega na acuerdo con pa deal y caba cu e negoshi y trafico di ilegalnan, cual ta danjando nos mercado laboral.
Colombia ya a cuminsa negocia cu Venezuela con pa habri frontera atrobe.
Gregorio Wolff
