Diadomingo 19 juni Gustavo Petro a ser eligi como presidente y Francia Marques como vice-presidente di Colombia. Nan agrupacion politica of partido yama Pacto Historico.
Un pais neo-liberal, explota y manipula na beneficio di e imperio den nos hemisferio y mas poderoso cu humanidad a conoce e ultimo 100 añanan,.
Awe 35% di e poblacion ta biba den pobresa.
E oligarkia neoliberal y narcofraficantenan ta doño di mas cu 90% di tur tera fertil pa agricultura. Milnan di campesino, indjannan y lidernan social a wordo asesina e ultimo añanan, e conteo a pasa 300.000 y miyonnan di desplazados den Colombia mes.
Colombia, Syria y awor Ucraina ta e paisnan cu tin miyonnan di habitante pafor di nan frontera, na Venezuela tin alrededor di 5 pa 6 miyon Colombiano, kendenan a hui pa e falta di Paz, falta di Husticia Social, hopi discriminacion y masacrenan na granel.
Pa colmo Merca pa hopi añanan tin como 8 basenan militar na Colombia pa bringa e narcotraficantenan. Pero e negoshi di droga tur aña ta sigui crece, pasobra na Merca e consuma principal ta y esnan cu ta dirigi e trafico awor ta biba na Merca y mayoria di ganashi ta keda Merca. Maske Colombia tin su caponan y lewlew uno ta ser extradita pa Merca, pa haci como si fuera cu Merca y Colombia ta serio den nan lucha contra droga.
19 Juni 2022, dia Historico, unda e pueblo Colombiano a dicidi pa Sali defende Paz y Husticia Social dor di apoya un Pacto cu ta bay cambia e historia di e pais, historia cu ta cualifica Colombia awe como un pais hopi desigual bao su poblacion.
Pueblo a crea un situacion completamente nobo pa Colombia, unda un gobierno di Iskierda ta bay dirigi e pais aki.
Diadomingo 19 juni, un balente y noble pueblo di Colombia a Sali pa lucha pa e Paz tan anhela y e Husticia Social. Nunca tabatin asina hopi hende cu a bay vota na Colombia pa apoya e Pacto Historico cu ta bay cambia e pais asina desigual.
Un total di 58% di poblacion a bay vota, cual ta altisimo pa Colombia y di cual e duo Petro/Francia a ricibi 11.281.013, pa un victoria historico, ya cu ta promer biaha, den historia di Colombia durante mas cu 200 aña, Colombia ta bay conoce un presidente y vice-presidente di iskierda.
Colombia tin un historia tristo di asesinato di lidernan di iskierda durante campanja pa eleccion di presidente di Colombia.
Gustavo Petro ta un politico grandi bakia y inteligente cu conocimento grandi di politica tanto nacional como internacional. Petro ta ser clasica como uno grandisimo, kende por drenta cualkier discusion politico y sali esun cu a convence tur hende.
Su trayectoria largo como luchador social, su bon preparacion como economista, un ex-gueriyero di M-19, Nan ta bisa cu su experiencia como gueriyero ta haci cu e conoce e motibonan pakico un parti di pueblo a dicidi pa coy arma y bay den lucha arma. Consecuentemente su conocemente y experiencia den un proceso di paz ta grandi. Despues ta su funcionnan publico manera, senador, unda e tabata clave den elaboracion y creacion di e constitucion moderno di Colombia na 1991, cual ainda ta vigente, pero no poni den practica. Despues Petro a ser eligi como alcalde di Bogota y haciendo un tremendo trabao.
Tambe Petro otro biahanan tabata senador. Na 2018 Petro tabata candidato presidencial pero no a keda eligi. Petro tin un tremendo discurso y su experiencia politica di hopi aña, ta pone cu e por hiba discursonan largo pero di nivel cu tur hende kier scucha.
Francia Marques Mina, un muher luchador afro-decendiente, cu na edad di 15 aña tabata lider na su poblacion contra multinacionalnan stranhera cu kier apodera di nan tera.
Despues a bira mama soltera na edad joben, pero asina mes a sigui cu accionnan como luchador social y tambe sigui cu su soño pa studia y bira un profesional. E a wordo admiti na un universidad di Cali pa studia derecho y cual e a termina cu éxito. Su estudio di derecho ta pa yudele y su hendenan den cuestionnan legal contra e multinacionalnan.
Pa por a studia y mantene su jiunan e mester a traha como Cria di Cas. Un tanta a yudele cu un apartamento.
Na 2014 Francia a lidera un marcha di Cauca pa Bogota 400 km, unda e a organiza muhernan di su bario y otro bisinjanan pa stop e compania mundial di mina di ora na Cauca. E marcha a cuminsa chikitu, pero a caba granisimo na Bogota. Na caminda nan tabata ricibi tur apoyo e.o. cuminda y lugar pa drumi. Na Bogota nan a campa dilanti di e oficinanan di e ministro di asuntonan Interior pa despues sinta negocia y yega na acuerdo cu Gobierno pa stop e compania mundial cu su trabaonan pa coba oro na Cauca.
Cu esaki Francia a ricibi reconocimento nacional y internacional y e a gana e Goldman Environment Prize. Hopi ta yama esaki e premio Nobel pa medioambiente.
Francia semper cu su bistirnan colorido, demonstrando su decendencia Afro.
Den e campaña politica e a a lansa hopi slogan manera “los y las nadies”, saca for di un poema di e escritor Uruguayo Eduardo Galeano cu ta nifica e pobernan cu no tin nada hasta hopi biaha tin solamente un number. Pa nan e ta bay goberna.
Tambe ta conoci “Vivir sabroso”. E ta un expresion di costa pacifico y cual ta nifica, pa su hendenan na Colombia biba den paz, cu husticia social, tur hende tin 3 cuminda tur dia, cu anochi e paramilitarnan no ta bati na bo porta y bay cu un familiar, cu bo ta waak bo jiu nace, bay school y bira muher of homber decente, sin cu e ta wordo mata dor di paramilitarnan.
Pacto Historico ta bay converti su mes den un Frente Amplio Nacional
Awor, un siman despues di 19 juni, despues cu hopi hende specialmente e derechistanan a kere cu Petro/Francia ta bay goberna solamente cu su hendenan di Pacto Historico,ta resulta otro.
Petro a lansa e idea di un Frente Amplio Nacional, unda otro partidonan hunto cu Pacto Historico ta bay traha ariba un plan pa goberna Colombia, ya cu e problemanan sali for di 200 aña di mal-gobernacion ta grandisimo y nan ta grita pa solucion. Pues un politica di Unidad y di reconciliacion politico. E gobierno mester ta pa tur Colombiano, teniendo na cuenta e problemanan grandi. Aserca e pais durante e ultimo 20 pa 25 añanan a conoce confrontacionnan y divicionnan cu e consecuencia cu e gruponan di esnan cu poder y riconan por a bay cu e riquesa y teranan di e pais.
Esaki ta haci cu awor tin un parti grandi di pueblo cu ta biba den pobresa.
Varios movemento politico, tambe gruponan social, ya a duna di conoce cu nan kier ta parti di e Frente Amplio Nacional y dispuesto pa aporta cu ideanan y traha conhuntamente cu otro organisacionnan pa hiba Colombia dilanti.
Por bisa cu e grupo politico grandi, e liberalnan a duna di conoce cu nan ta apoya e Gobierno di Petro y e frente Amplio Nacional, maske nan ta bisa cu nan no ta bay forma parti di e gobierno Petro/Francia.
Petro a manda un invitacion na e partido di e dirigentenan ultra-derecho di e partido Centro Democratico di e politiconan Uribe/Duque/Frederico.
Nificacion di eligimento di Petro/Francia na nivel internacional.
Eligimento di Petr/Francia segun hopi analistanan internacional, a consolida Iskierdismo na Latino America, cual awor ta conoci como “La Patria Grande”.
Nos conoce un racha di eleccionan na Latino-America unda Iskierdistanan a ser eligi e ultimo añanan como presidente di nan pais.
Ultimo añanan nos a conoce na AMLO, Andres Manuel Lopez Obrador na Mexico, Fernandez/Kirchner na Argentina, Pedro Castillo na Peru, Gabriel Boric na Chili, Xiomara Castro na Honduras, Nayib Bukele na El Salvador. Pronto tin eleccion na Brazil y según tur pronosticonan e izkierdista Lula ta bay gana e eleccion.
Tambe tin e casonan di Daniel Ortega kende poco tempo pasa a ser reeligi, pero no reconoci dor di Merca. Na Venezuela Maduro a ser reeligi na Venezuela. E dos entidadnan mas renombra na Mundo pa loke ta observacion y control ariba eleccionnan, e Jimmy Carter Foundation y e observadornan di Union Europeo, tur dos a bisa cu e sistema di eleccion na Venezuela ta un di e mihornan di mundo. Toch Presidente di Merca, e loco Trump no a reconoce Maduro y a yama dictador y a nombra Guaido cu Venezolanonan no tabata conoce, sin a bay eleccion, como presidente di Venezuela. Na Cuba nos tin otro iskierdista como presidente di e pais, cu ta Minguel Diaz-Canel, eligi na 2019 como secretario General di Partido Comunista.
E eleccion di Preto/Francia como un gobierno Iskierdista a ricibi hopi elogio di e lidernan di e paisnan menciona ariba.
Cu Biden, Petro tabatin un combersacion caba cual a bay den bon ambiente. Pero nos tur sa cu e diferencianan ideologico y forma di Goberna ta grandi, pero Petro no ta para su so.
E tin apoyo amplio di e paisnan ariba menciona. Ta bon pa menciona cu Petro a ricibi e apoyo di e dos grandinan na mundo cualnan ta Russia y China.
Gregorio wolff
