Minister Gerlien Croes ta sigui un patron preocupante: den cada oportunidad e ta usa su rencor politico pa tira culpa riba Gobierno di MEP, sin motibo real y sin base. E no ta presenta un debate constructivo, sino un strategia di crea storias pa proyecta un imagen negativo riba su oponente.
Hereda di AVP: un stadion afgekeurd
Ehempel mas cla ta caso di Stadion na Dakota. E stadion cu Gobierno di MEP a hereda di AVP, tabata oficialmente “afgekeurd”: ningun partido no por a tuma lugar eyden. Tanto cu, pa representa Aruba den competencia internacional, muchanan a mester viaha pa Tampa, Florida, y huur un stadino na un costo di USD 200,000, solamente pa bo por usa e bandera di “home team”.
Ora minister Endy Croes a tuma cargo, e no a keda biba den pasado. El’a eligi pa mira dilanti y pone su vision: renoba e stadion. Un obra asina no ta costa 10 florin, pero un inversion di varios miyon. Y como no tabatin e fondo completo disponibel, Gobierno a cuminza cu un prome fase den forma realistico y responsabel.
E falta di sinceridad den critica di Gerlien
Awor Gerlien Croes ta sali cu un discurso infantil: “miyones gasta, pero beton ta cay”. Esey no ta mas cu un falta di sinceridad. Pasobra e realidad ta cu e stadion tin dos tribuna:
- Tribuna banda pazuid (lama): cu efectivamente tabata den un estado critico. E parti ey a wordo basha abao por completo y traha di nobo dor di compania Bohama segun nos.
- Tribuna banda panoord: no tabata den un estado tan severo pa exigi demolicion total, y pa motibo di fondo, el a keda pa un siguiente fase.
E ora, con sincero un minister por sigui repiti cu proyecto tabata mal haci? Si bo ta defende “transparencia”, dicon inventa storia pa crea duda riba un obra den beneficio di comunidad?
Atake constante y sospecho sin base
Nos ta lamenta e forma cu Gerlien ta sigui punta dede y trata cu keda sembra sospecha. Den parlamento mes e ta cuestiona facturanan, manera si tabata un caso di robo. E actitud ey no ta nada mas cu un demostracion cu Gerlien mes no tin experiencia real den construccion, ni comprension di e proceso compleho cu un obra infrastructural ta carga.
Tur cos e ta mira e kier pint’é malo, manera si su unico meta ta busca un “cadaver” politico pa sacia su sed di odio riba su opositor. Esey no ta transparensia, esei ta mal informacion, y hasta manipluacion di informacion.
Gerlien mester laga su odio los
E pueblo ta merece un debate real, basa riba hecho y no riba manipulacion. Gobierno di MEP a tuma un herencia desastroso y a converte esey den un proyecto cu vision pa futuro. Crítica constructiva ta necesario, pero inventa historia y sembra duda no ta politica nobo, sino politica bieu, di division y manipulacion.
Gerlien mester accepta di a haya un stadion “APROBA” pa FIFA Y CONCACAF y e prueba ta tur e weganan internacional cu a tuma lugar unda e mes a bay sinta den tribune pa precencia e weganan.
Cu tin trabao cu mester sigui wordo haci, ta totalmente berdad. Ta deber y trabao di Gerlien pa tuma e trabaonan over, haci nan, sin yora, sin zeur, sin critica y percura pa e trabao keda cla. Si tin benton ta cay di e tribune banda panoord, tin cu busca e solucion pe parti ey. Pero no purba bende pueblo cu beton ta cay di e tribune nobo nobo banda pazuid.
