E reciente reunion di presupuesto supletorio na Aruba, cu a termina dialuna anochi den parlamento, unda miembronan di oposicion a vota contra varios proyecto beneficioso pa nos pais.
E oponentenan principal di e beneficionan ta e fraccion di Avp y Mike Eman, hunto cu e fraccion di MAS y Marisol Tromp, Gerlien Croes y Rycond Santos totalisando.
Nan voto “contra” ta un rechaso directo di proyectonan cu ta destina pa mehora varios aspecto importante pa e ciudadanonan y promove progreso den diferente area.
Proyectonan Rechasa:
Oposicion a vota contra di e construccion di un scol nobo di Mavo na Paradera cu lo bira e cas nobo Juliana School, un proyecto di sumo importancia. Minister Endy Croes a splica e plan aki den parlamento, unda actualmente nan ta haya les na algun local na veld di Britannia. Cu nan voto contra, nan a laga e districto di Paradera cay.
E proposicion pa traha un post nobo di brandweer a wordo rechaza, poniendo preguntanan serio riba nan vision di siguridad pa comunidad.
Ademas, nan a opone pa asigna fondonan pa trahadornan di SABA, lagando asina e trahadornan di cas di cuido cay.
Impacto riba bienestar :
E voto contra e proyectonan positivo aki ta wordo considera un atentado significativo riba bienestar di pueblo di Aruba.
E rechasonan aki, aparentemente motiva pa motibonan politico partidista of simplemente un postura negativo, tin un solo meta, esta pa stroba gobierno pa avansa cu proyectonan esensial pa desaroyo
E capricho di vota “contra” di presupuesto supletorio ta mustra riba necesidad pa politiconan supera e diferencianan politico na fabor di progreso y prosperidad di Aruba. Na un momento crucial pa tuma decision, e pregunta ta: e isla por haya un oposicion mas constructivo pa por avansa pa un futuro mas positivo y colaborativo?
Na final coalicion a brasa y apropa s proyectonan aki.
