Te na boso biehes Ami lo ta mescos, y te na boso anjanan di cabey blanco, lo mi carga boso!
Mi a traha boso, y lo Mi sostene boso,
Lo Mi carga boso y lo mi libra boso.( Isaias 46:4).
Sinembargo mi ta constantemente serca Bo, Bo a cohe mi man drechi tene.
Cu Bo conseho lo Bo guiami y despues ricibimi den gloria.
Te ken mi tin den cielo fuera di Bo,y fuera di Bo mi no ta desea nada riba tera.( Salmo 73:23-25).
No tene miedo, pasobra Mi ta cu bo, no desmaya pasobra Mi ta bo,Dios.
Lo Mi fortalese bo si lo Mi yudabo, si lo Mi sostenebo, cu mi man drechi di husticia.( Isaias 41:10)
Pasobra Ami ta Senjor bo Dios,Kende ta sostene bo man drechi, kende ta bisa bo, No tene miedo lo Mi yudabo.( Isaias 41:10).
Esaki ta palabra di fortalesa cu nos mester lanta nos yuinan cu ne, palabra pa encurasha, no pa decurasha, palabra pa edifica y construi, no palabra pa destrui.
Pa asina hobennan lanta cu bondad den nan curason,no pa cos ta manera ta awor aki cu bo ta hanja un mucha ta cana cu gana di bringa, cu vengansa den su curason, y tin biaha hasta cu deseo di mata, pasobra e a tende hende papia, e a wak pelicula, e tambe kier cana cu su gun, pasobra diabel tin su wowo tapa, cu tur caminda e ta mira solamente, enemigo y asina yama “Haters”.
Na unda nos ta bay asina aki? Ta nos deber como mayor y un mandato di Dios, pa lanta y guia nos yuinan den caminda di Dios, pa nan curason ta habri pa Senjor, pa nan sa for di tempran cu e caminda di Dios ta e unico caminda berdadero, e unico opcion, no tin otro,pasobra hende no por scohe nada contra su mes, tur hende mester di Dios den nan bida.
Tur hoben mester ta na altura cu maldad y inmoralidad no ta paga, si un hende pidibo, of mandabo haci algo malo contra un otro persona no hacie, y hasta si hende ofrece bo placa , pa haci malo contra otro hende , bo mester rechasa inmediatamente, pasobra mal influencia ta promesa falso. Pasobra despues ta bo mes ta keda malo, pasobra bo a danja bo reputacion, bo a perde bo integridad, y esey ta cosnan cu bo mester pa henter bo bida.
No perde bo karakter ni tampoco rebaha e educacion cu bo mayornan a duna bo den Cristo, pasobra e mundo aki no tin nada pa ofrece, solamente enganjo y cosnan temporal, pesey e palabra di Dios ta bisa nos tur claramente cu amistad cu mundo ta enemistad cu Dios.( Santiago 4:4).
No ta nada nobo, pero nos tin cu haci hopi oracion, pa nos hobennan pa nan no cay sera, pasobra ta parce manera ora un hoben cay sera, e ta sali mas peligroso, cu ora e a drenta, pasobra prison ta cuna di mal influencia y mal spirito.
Hopi hoben ta drenta prison, y ta sali cu enemigo nobo cual nan ta kere cu nan tin cu defende nan curpa contra dje aki fo.
Pesey ora nan sali enbes di busca scol pa bay y trabao pa traha, nan kier haci tur locual ta posibel pa cumpra arma y asina defende nan mes.
Ta tempo pa nos sinja nos hobennan pa pone nan bida den man di Dios, y entrega nan mes completa mente na Cristo Hesus y laga Cristo Hesus guia nan bida.
Sinceramente, Pastor Marcel Balootje
