Esaki ta un promesa cu Dios a haci nan nos, pero ta parce cu hopi hende a lubida y ta confia tur cos den man di hende, y duna hende chens di haci bofon y burla di Dios y di nan mes.
Pero Dios su promesa no ta cambia pasobra Senjor mes a bisa: Si Mi pueblo cu a wordo yama na Mi nomber , humiya nan mes y haci Oracion, y busca Mi cara,y bira for di nan mal camindanan , e ora ey lo Mi tende for di cielo,y lo Mi pordona nan pica, y cura nan tera.( 2 Cronicanan 7:14).
E pueblo di Dios ta wordo identifica como tur esnan cu ta kere den e Yiu unigenito di Dios, esnan cu a confesa cu nan boca cu Hesus Cristo ta Senjor y kere den nan curason cu Dios a lante for di morto, pa nan ricibi salbacion, esey ta e pueblo di Dios, pasobra e palabra di Dios ta bisa cu esun cu kere lo ta salba, esun cu no kere ta condena caba.
E pueblo di Dios ta wordo identifica door di esnan cu a kere cu henter nan curason den eYiu unigenito di Dios.
Aki nan no tin asunto di rasa, ni color, ni religion, ta relacion ta conta, pasobra E lo bin busca tur esnan cu a kere den dj’E y tin un relacion personal cun’E, pasobra salbacion ta personal.
Tambe ta para scirbi:No preocupa pa nada, ma den tur cos, pa medio di oracion y suplica cu gradicimento, laga boso peticion ta conoci dilanti di Dios.
Aki nan nos ta mira Fe den accion ora cu nos haci oracion y kere firmemente den e poder di Dios,
Manera Elias a kere y Dios a baha candela for di cielo,
Manera Anna a kere y Dios a habri su matris y dune un yiu. ( 1 Samuel 1:20).
Manera Rey Ezequias a kere y Dios a libra e y su pueblo.
Manera Hesus a kere y su Tata a lante for di morto, y awe E ta sinta na man drechi di Su Tata, y nos tur sa debidamente cu tur rudia mester dobla y tur lenga confesa cu Hesus Cristo ta Senjor pa gloria di Dios Tata.
Semper tabata asina, y lo no cambia, cu esnan cu manifesta den oracion dilanti di Dios, ta mas cu vencedor, nan lo tin victoria, pasobra nan a kere cu Dios por haci tur cos.
E pueblo di Israel no por a libra nan mes for e gara di sclavitud di Egipto, ta Dios a scucha nan clamor y Dios a usa Moises como instrumento di Su gloria pa libra e pueblo.
Lot no por a sali for di Sodoma y Gommora, ta Dios a scucha e oracion di intercesion di Abraham y a manda angelnan pa saca Lot for di Sodoma y Gommora.
Y awe nos mes no por salba nos mes, ni tampoco nos no por salba ningun hende , pero pa gracia nos ta salba pa Fe, esey ta nifica cu nos por haci oracion pa un persona cu ta biba den scuridad diabolico, pa Dios rescata, y redimi su alma for di gara di satanas, y asina salbacion por yega na su bida pa medio di Cristo Hesus.
Si e pueblo di Dios, por a djis recorda cuanto poder oracion tin, nan lo a stop di confia riba man di hende, busca cara di Dios, y Dios lo sali na nos defensa, duna nos gracia, favor y Gran victoria.den Cristo Hesus, Amen.
Sinceramente, Pastor Marcel Balootje
