Un feliz dia colma cu hopi bendicion, amor y paz di Señor.
“No pensa cu Mi a bin pone un fin na e enseñansa di e bukinan di ley y di e profetanan, al contrario Mi a bini pa asina Mi laga nan nificacion berdadero sali na cla” (Mateo 5,17)
Den Evangelio di awe Hesus ta hiba e ley na Su plenitud. Nos por papia di cumpli cu ley den dos parti: Haci tur cos manera nan ta bisa of completa loke ta falta. Ora Hesus a haci Su entrada den nos bida E ta transforma nos totalmente. E ta fortalece of complementa nos personalidad. E bon noticia ta cumpli den Hesucristo, nos Señor. Hesus ta completa e ley di testament bieu cu esun nobo cu ta ley di amor, stima Dios den tur cos y bo prohimo manera bo mes. Dios ta scirbi e ley di amor den nos curason y ta drama e Spirito Santo den nos alma pa cumpli cu boluntad di Dios. E ta haci’E cu agrado, cu yen di amor y no manera un esclavo. Ora nos ta obedece e ley di amor nos ta cumpli cu tur e leynan y esey ta agrada Dios. Si den accionan nos tin amor pa motivacion, nos lo gana e alegria y gloria den cielo.
Oracion: Mi Dios, cu Bo infinito amor mi por yega na plenitud di mi bida. Yena mi cu Bo gracia pa nunca mi contradici Bo mandamentonan. Amen.
