Un feliz dia yena di bendicion y colma cu hopi gracia, amor y paz di Señor.
”Laga e muchanan bini cerca Mi. No kita nan di bini, pasobra reino di Dios ta pertenece na esnan manera nan” (Marco 10, 14)
No semper e muchanan ta wordo teni consideracion cu nan. Hopi biaha nan ta esnan cu ta wordo perhudica grandemente. Pa cual motibo Señor ta dirigi Su atencion na nan. Hesus ta stima y tin cariño pa mucha y ta usa mucha pa Su bienestar. Pero dos cos ta importante: 1. Tempo, 2. Afecto pa Mucha. Hesus ta pone man, resa cu e muchanan y bendiciona y protega nan. Nos a ripara cu pa e discipelnan e muchanan no ta importante. E ta algo cu nos mester tene cuenta cu ne pasobra hopi biaha e muchanan ta bira victima di un separacion of un union inmadura. Esey ta pone cu nan no ta haya e luga cu nan tin cu haya y ta hiba nan na un futuro indesea, nos next generation. Laga nos awendia moldea nos pensamento, hiba e muchanan cerca Hesus door di duna nan tur sacramentonan, pa cuminsa Bautismo cu ta un herencia y un regalo di Dios. Laga nos prepara nos yiunan pa cuminsa un bida spiritual cu hopi amor. Asina nos cas mester ta e prome skol di fe. Pasobra nos famia mester ta e prome Iglesia domestico.
Oracion: Hesus mescos cu Bo a percura pa e muchanan nos tambe kier pertenece na Bo skol di evangelisacion pa nos drenta e reino di Dios. Amen.
