Un feliz dia yena di bendicion y colma cu hopi gracia, amor y misericordia di nos Bon Dios.
”El a bati riba su pecho como señal di arepentimento y bisa: Señor, tene misericordia cu mi, un hende pecador!”Lucas 18,13)
E palabra cardinal, den e versiculo aki, cu nos mester para keto na dje ta: Arepentimento. Berdad ta cu nos kier pa Señor tene misericordia di nos, pero sin un arepentimento geniuno (real) esey lo no por tuma luga. Arepentimento ta mas cu djies reconoce cu bo a haci algo malo (comete un pica). Arepenti di berdad ta bay man den man cu un cambio di pensamento, un cambio den bo actonan y tambe un cambio den bo curason. Ta importante pa no solamente arepenti pero bira lomba tambe pa e pica y busca e caminda pa hiba nos bek na Dios pa asina haya Su pordon. Arepentimento ta un medio special cu ta hiba nos na liberacion di nos picanan. Corda cu pica ta stroba nos di progresa den nos bida spiritual y por te hasta para esaki por completo prome cu bo realisa. P’esey importante ta pa nos confesa nos picanan pa haya pordon.
Oracion: Oh Dios di piedad y misericordia, pa medio di Bo inmenso amor, laba for di mi tur pica y culpa. Purifica mi di tur malo. Mi sa cu mi a peca contra Bo. Si Señor, mi sa cu mi a faya cu Bo y mi ta reconoce esey. Mi ta un pecador, pero scucha mi ruego bon Dios y libera mi di tur pica. Amen.
