Un dia fructifero y cu Dios yena boso cu Su amor paternal.
”……..niun hende cu bandona su cas, ruman homber y ruman muhe, mama, tata, yiu of tereno pa mi motibo y pa motibo di e Bon Noticia no ta keda sin haya den e tempo aki shen bes mas tanto…………………….”( Marco 10,29 )
Awe nos por a siña di e lectura di Sirag cu ta agrada Señor si hende bira lomba pa maldad y Señor lo sa di bendiciona e tera cu El a dun’e.Tambe e salmista ta mustra nos cu esun cu ofrece alabansa ta honra Señor, un hende asina ta habri caminda pa Señor mustr’e salbacion di Dios. Den e Evangelio di Marco Hesus ta priminti nos cu si nos laga tur cos un banda, nos lo no keda sin haya shen bes mas tanto na bendicionnan. Pero hopi biaha e no ta facil pa nos laga los for di cosnan material y di nos rikesa terenal. Tur cos cu nos tin nos a ricibi for di Dios y E kier pa nos comparti cu otronan den necesidad. Pa nos por sigui Hesus nos tin cu ofrece sacrificio, carga nos cruz cu hopi amor y pasenshi. Nos curason mester ta semper pega na cosnan spiritual prome y Dios mes lo zorg pa nos cosnan terenal. Ban ofrece na Dios Altisimo cu un cara contento loke ta na nos alcance y Señor lo debolbe nos cu man yen. Laga nos busca pa sa kico ta agrada Dios p’asina nos por gana e Bida Eterno.
Oracion: Señor laga nos ta un instrumento di Spirito Santo den Bo man pa medio di Cristo nos Señor. Amen.
