Un feliz dia yena di bendicion y gracia, amor y paz di Señor.
Niun catibo di cas no por sirbi dos shon, pasobra of e ta odia esun y stima e otro, of e ta pega un na su curason y menosprecia e otro. Boso no por sirbi Dios y placa pareu. (Lucas 16,13)
Hesus a biba un bida diferente for di conceptonan di hende. Aunke e tawata Yiu di Dios, nunca El a biba den grandesa di mundo. No, El a biba humilde y den sirbishi; y esey E kier pa nos tambe haci. Lamentablemente nos mundo materialista ta corumpi mente di hende y ta haci nos kere cu nos felicidad ta sinta den cosnan material di e mundo aki. Aparentemente no ta existi humildad ni sirbishi mas. Y di Dios nos no kier tende mes den e mundo engañoso aki. Awor ta na nos mes pa scoge kico of kende nos kier sirbi; placa of Dios. Un cos ta sigur: ”miho drenta bida eterno mancaron of coho, cu bay tira cu dos man of dos pia, den e candela cu no ta paga nunca mas” (Mateo 18, 8) Dios a crea cada un di nos cu un boluntad liber, pero un echo ta cu diariamente nos lo mester scoge entre un comportacion determina pa un vision sincero den Cristo, un bida humilde, conforme y sincero of un bida caracterisa pa bicionan di poder y fama den bista di un mundo materialista. Bo ta liber pa scoge kico of ken bo kier sirbi. Ami, cu tur mi debilidadnan a dicidi di sirbi Señor!
Oracion: Señor danki un biaha mas pa tene misericorda cu mi. Amen.
