Un feliz dia yena cu bendicion di Dios y colma cu amor y misericordia
di nos Bon Dios.

“Sea misericordioso, manera boso Tata ta misericordioso.” Lucas 6,36

Awe e palabra ta mustra nos e manera pa agrada Dios y esey ta pa nos
ta misericordioso manera nos Dios ta. Dios no a yama nos pa husga
hende y mucho menos pa paga malo cu malo. Awe nos tin cu wak tur hende
cu wowonan di misericordia paso nos no sa kico ta e plan di Dios pa e
persona ey. Awe e palabra ta invita nos pa nos cuminsa wak tur hende
cu wowonan spiritual pa asina nos por wak e obra mahestuoso di Dios
den nan. Laga nos corda e humildad y misericordia di nos Señor Hesus
cu ainda na cruz tabata cla pa pordona y bendiciona. Hesus ta nos
mihor ehempel y guia, laga nos fiha nos bista riba djE y pidi’E yuda
nos riba nos caminda pa ta misericordioso mescos cu nos Tata.

Oracion: Tata awe nos ta yama Bo danki pa Bo amor, danki pa Bo
misericordia, danki pa Bo gracia, danki pa e pasenshi cu Bo tin cu
nos. Yuda nos Tata pa nos por ta mas misericordioso y mas amoroso cu
tur hende. Nos ta yama Bo danki pa tur cos den e nomber di Hesus.
Amen.

LEAVE A REPLY

Please enter your comment!
Please enter your name here