Hopi biaha bo ta tende hende ta papia bisando , mi tabata sa cu e cos ey ta bay sosode, mi tabata sa cu tal persona ta usa droga, of mi tabata sa cu e ta bay cay sera, mi tabata sa cu e mucha ey ta bay keda sinta, o mi tabata sa cu e homber ey ta un burache, cosnan negativo cu nan tabata sa pero nunca nan no por a avisa, cu algo ta asina bay sosode, pa asina e por wordo preveni.
Nos situacion ta hopi mas serio cu nos ta kere y e ta exigi Fe y Oracion pasobra tempo a cambia y e enemigo a cambia su strategia.
Y ora ta trata di bo famia, como mayor bo mester haci oracion y vigila pa evita cu maldad por drenta bo hogar .
Hende grandi ta bisa cu un parha por bula pasa over di bo cabes, pero abo no mester permiti e parha traha su neishi riba bo cabes.
Mirando con maldad ta avansa tur caminda, cu antes nos tabata bisa, cu aki e no ta sosode, awel awe nos tur ta mira pa nos por kere con maldad a alcansa nos .
Y hopi ta puntra con nos ta bay haci, kico e cos aki ta, con nos yuinan y nietonan lo bay biba den e situacion aki, especialmente ora abo como Mayor tuma tempo pa lesa 2 Timoteo Capitulo 3 vers 1 te cu 9.
Lesando esaki bo ta bay mira con importante bo oracion ta , pa Dios wardabo hogar for di tur e maldad cu nos ta wordo avisa di dje, pasobra nos oracion tin poder pa para maldad .
Nos oracion tin poder den nomber di Cristo Hesus pa kibra tur bruheria, y tur otro tipo obra di scuridad.
Nos oracion tin poder den nomber di Cristo Hesus pa sanacion y liberacion tuma lugar den nos bida, no ta importa e malesa , pasobra tur cos ta posibel pa esun cu ta kere.
Nos oracion tin poder den nomber di Cristo Hesus pa para tur plan di enemigo contra nos yuinan.
Ta hopi cos tin ta lanta contra matrimonio y famia, contra hubentud , nos tur sa kico esaki ta nifica.
Mirando leynan contra palabra di Dios cu ta wordo aproba rond mundo, hende por puntra nan mes con nos lo haci ora muchanan cuminsa hanja enseñansa na scol cu ta completamente contra e palabra di Dios. Y pronto esaki lo bati na nos porta.
Tin paisnan cu ya caba mayornan ta duna nan yiu homeschooling pa asina evita cu nan yiu por wordo doctrina den locual no ta di acuerdo cu e palabra di Dios.
Awor ta e tempo pa nos haci oracion mas tanto cu ta posibel, ta tempo pa ayuna, ta tempo pa vigila, ta tempo pa evangelisa, ta tempo pa duna testimonio, di Dios su grandesa, pa tur hende por sa ken Hesus Cristo ta, y con nan por yega na salbacion.
Oracion ta prevencion di maldad, y nos Dios semper ta scucha y e ta cla pa yuda nos.
Sinceramente
Pastor Marcel Balootje.
