Sin oracion den nos bida, nos bida ta manera un mata sin awa, pasobra oracion ta comunicacion cu Dios, pa nos ricibi guia y instruccion di Dios.
Tin hopi hende ta bisa cu Fe sin obra ta morto, y esey ta para scirbi, pero hopi biaha ta presenta situacion den nos bida, den cual ta oracion so nos por haci, pasobra ta solamente Dios tin e ultimo palabra.
Oracion ta trece pas caminda palabra di hende no por yega , oracion ta kita dolor,cambia pensamento,oracion ta drecha relacion, oracion ta trece sanacion y liberacion.
E poder di oracion ta surpasa tur cos, pasobra e poder di oracion ta poder di Dios, y Dios ta Todopoderoso,pesey ora nos haci oracion nos tin di kere y confia cu Dios ta hacie y Dios lo hacie pa nos.
Situacion dificil por presenta, tur momento, un accidente, un operacion urgente, un parto delicado, tur eseynan ta pone nos haci oracion y pone tur cos den man di Dios.
No preocupa pa nada, ma den tur cos,pa medio di oracion y suplica cu gradicimento, laga boso peticionan ta conoci dilanti di Dios.( Filipensenan 4:6).
Oracion ta nifica, confia Dios, y laga tur cos den man di Dios, demostrando cu Dios ta Soberano , y cu ta nos tin mester di Dios. Dios tin poder pa kita preocupacion, pesey ora nos pone un cos den man di Dios, semper ta mihor lage den man di Dios y no bay haci nada riba nos propio forsa, pensando cu nos tin cu yuda Dios.
Ora Moises tabata para dilanti di Laman Corra e mester a kere den Dios y sigi cana, no scuchando opinion y grito di hende, tampoco pone su bista riba e enemigo cu tabata bini su tras, pero den tur obediencia e a sigi cana, y Dios a sostene grandemente.E laman a habri pasobra Dios a habri e laman.
Pedro a cana riba awa, cu su bista fiha riba Hesus,ora e a laga circumstancia kita su atencion for di Hesus, e a sink.
Hesus a para riba awa y saca Pedro for di den awa, y Pedro y Hesus a cana bay den e boto.
Oracion ta yuda nos pa tene man di Dios, y mantene nos bista riba Dios, laman por ronca y tera por tembla, situacion dificil por presenta, pero laga semper e oracion cu ta nos maximo comunicacion cu Dios prevalece riba tur cos.
Dedika boso mes na oracion,keda alerta den dje cu un actitud di gradicimento.( Colosensenan 4:2).
Nos mester haci oracion pa guia nos bida. (Salmo 25:4-5).
Nos mester haci oracion pa libra nos for di tentacion ( Mateo 26:41).
Nos mester haci oracion pa conoce e boluntad di Dios.( Jeremias 29:11).
Tur loke boso pidi den oracion cu Fe, boso lo ricibi.( Mateo 21:22).
Pesey mi ta bisa boso,tur loke boso pidi ora boso ta haci oracion,kere cu boso ta ricibie y e lo bira di boso.( Marco 11;24).
Mas profundo nos bay den oracion ta mihor pa nos, pasobra e palabra di Dios,ta sinja nos pa haci oracion sin stop, esey ta nifica cu nunca oracion no ta di mas, semper lo tin lugar na e trono di Dios, pa nos deposita nos oracionnan.
Den Juan 14;13-14 Cristo Hesus ta bisa lo siguiente: Tur loke boso pidi den Mi nomber, esey lo Mi haci, pa e Tata wordo glorifica den e Yiu. Si boso pidi algo den Mi nomber, lo Mi hacie.
Pesey no laga nos duda, pero pidi tur cos, den nomber di Cristo Hesus, y E lo hacie pa nos.
Sinceramente, Pastor Marcel Balootje
