Ora nos corda locual tin para den Efesionan 6:12 bisando: Pasobra nos lucha no ta contra carni y sanger,sino contra e gobernantenan, contra e podernan, contra e forsanan mundial di e scuridad,contra e forsanan spiritual di maldad den e lugarnan celestial.
Y ta bolbe bisa nos den 2 Corintionan 10:3-4 : Pasobra maske nos ta cana den carni, nos no ta bataya segun carni,Pasobra e arma nan cu nos ta bataya cune,no ta carnal, ma poderoso den Dios pa basha e fortinan abao.
No lubida con den 2 Timoteo 3:1-5, ta para scirbi: Ma sabi cu den e ultimo dianan tempo trabahoso lo bin, y tur locual ta pasando , ta demostra cu e palabra di Dios, ta berdadero, y locual e palabra ta bisa ta cumpliendo.
For di principio Dios a papia cla cu nos tur bisando den 2 Cronicanan 7:14: Si Mi pueblo cu a wordo yama na Mi nomber humiya nan mes, y haci oracion, y busca Mi cara, y bira for di nan mal camindanan , e ora ey lo Mi tende for di cielo y lo pordona nan pica y cura nan tera.
Dios a duna nos e informacion corecto pa nos sa con atende den e tempo cu nos ta bibando, pasobra di berdad cu mal influencia , inmoralidad y malicia ta purba domina e mundo aki.
E falta di temor di Dios y falta di respet pa bida di hende tanto hoben como adulto mayor a aumenta, drasticamente, nos por conta semper cu ley lo actua despues cu algo sosode.
Pero Dios a sinja nos pa haci oracion, pasobra oracion por preveni, corta y cancela e plannan di diabel y pone asina cu e tin cu huy bay pasobra pa medio di oracion cu fe nos tin e autoridad pa destrui,mal influencia.
Nos tin cu bay bek na oracion, pasobra ta esey ta locual tin poder, ningun terapia moderno no por supera poder di oracion, pasobra Dios ta Todopoderoso y Dios tin poder riba tur cos.
Tur locual ta move riba e mundo aki, ta bao di control di Dios, esey hende no mester lubida aunke con ciencia y technologia por aumenta.
Awor mas cu nunca ta tempo pa bay bek na rudia, y haci oracion den cada cas, pa asina Dios por rek su man y yuda nos.
Pasobra si Dios no cuida, envano hende ta cuida, nos por tin awendia security, sistema di alarma sofistica, pero keto bay nos mester di e man di Dios riba nos bida, pasobra ta Dios ta nos seguridad, e ta nos baranca fuerte, den Dios nos tin speransa.
Pa Dios nada ta imposibel, y Dios no ta sinta man crusa, y no tin ningun hende ni tampoco, ningun circumstancia cu por mara man di Dios.
Locual ta pasa ta cu hende a aparta for di e caminda di Dios, bira materialista, stimado di placa, sin respet pa mayor, y tambe mayor a bira iresponsabel.
Nos ta bibando den un era digital, pero Dios si no a bira digital, nos por aserca Dios su trono di gracia tur momento pasobra Dios tey pa nos.
Nos tin cu corda riba nos ayuno y oracion, pasobra nos no ta bringando contra cualkier cos, nos lucha ta contra forsanan di maldad, di scuridad den lugarnan celestial, pesey cada famia mester bin bek na oracion den nomber di Cristo Hesus den nan cas.
E maldad tey , nos tur sa, inmoralidad y violencia a aumenta , nos tur sa, pero e Poder di Dios tey pa ora nos yama riba Su nomber, semper e ta defende nos.
Sinceramente, Pastor Marcel Balootje
