Pa experiencia e poder di oracion , nos mester haci oracion, ta imposibel experencia Dios, den nos bida, si nos no ta haci oracion. Den e tempo cu nos ta biba aki, bo ta nota ora un hende ta falta oracion den su bida pasobra constantemente e ta papia di duda, y no ta para den Fe, pa e mira locual Dios tin pa su bida.
Hopi preocupacion ta yena bida di hende ora nan no ta haci oracion, pero ta gamble cu e palabra di Dios, papiando hopi pero no ta haci oracion, pasobra tur hende mester haci oracion na Dios, pa nan tin comunicacion cu Dios.
Oracion ta algo hopi personal y hopi profundo, y nos bida di oracion mester ta algo serio, cu nos no tin di permiti nada, ni tampoco ningun hende interveni den nos bida di oracion pasobra esey ta e comunicacion puro y berdadero cu nos tin cu Dios.
Ora nos ta haci oracion cu fe, sin duda, nos ta comunica cu Dios, y Dios ta contesta tur esnan cu ta yama riba Su nomber, Dios no ta tarda, ni tampoco Dios ta lubida, Dios su tempo ta perfecto.
Oracion tin poder, pa sanidad, pa liberacion, pa kibra tur cadena diabolico, pa saca hende for di adiccion, for di profundidad di scuridad, for di cuna di perversidad y inmoralidad, oracion haci den nomber di Cristo Hesus, ta penetra caminda remedi no por yega, y caminda terapia no ta duna resultado.
No ta pornada e palabra di Dios, ta bisa den Filipensenan 4:6-7: No preocupa pa nada,ma den tur cos,pa medio di oracion y suplica cu gradicimento,laga boso peticionan ta conoci dilanti di Dios. Y e pas di Dios , cu ta surpasa tur comprendemento,lo warda boso curason, y boso mente den Cristo Hesus.
Ora nos dobla nos rudia dilanti di Dios, nos ta demostra obedencia, fe, y reconocemento cu ta Dios ta e unico cu por yuda nos, nos ta reconoce cu Dios ta Soberano, den tur cos, y cu cielo y tera por pasa , pero e palabra di Dios no ta pasa, y cu Dios ta Todopoderoso, y no tin pa compara, ni tampoco iguala cu nos Dios.
No tin ningun clase di bruheria of maldicion cu por supera e Poder di Dios, ni maske kico hende por papia of haci contra bo bida, oracion den nomber di Cristo Hesus, haci cu fe ta capas di tumba muraya, kibra cadena, y trece libertad den bida di cada persona.
Pesey confesa boso picanan un na otro,y haci oracion un pa otro,pa boso wordo cura. E oracion efectivo di un hende hustu por hopi.( Santiago 5:16).
Haci oracion sin stop, sea agradecido den tur cos pasobra esaki ta e boluntad di Dios, pa boso den Cristo Hesus.( 1 Thesalonisensenan 5:16-18).
Pesey Mi ta bisa boso,tur loke boso pidi ora boso ta haci oracion,kere cu boso ta ricibie, y e lo bira di boso.( Marco 11:24).
Y tur loke boso pidi den oracion cu fe, boso lo ricibi( Mateo 21:22).
Senjor ta leu for di e malbadonan, ma E ta tende oracion di e hustonan.( Proverbionan 15:29).
Keda vigila, y haci oracion, pa boso no cay den tentacion, e spirito ta boluntario, ma e carni ta debil.( Mateo 26:41).
Ta nos tur su deber pa aumenta nos oracion riba e isla aki, especialmente den e tempo trabahoso cu nos ta bibando aden , manera e palabra di Dios ta bisa,( 2 Timoteo 3:1-5) pasobra ki prueba mas nos mester ora nos ta mira karakter di hende ta cambia, ora nos ta mira con inmoralidad kier domina.
Sinceramente, Pastor Marcel Balootje
