Obediencia ta demostra amor na Dios y ta e condicion cu ta pone oracion wordo contesta.
Oracion y Fe ta nifica cu nos kier e guia di Dios den tur cos, nos ta invita Senjor pa participa den nos bida.
Oracion ta un clamor y suplica na Dios, habriendo porta den nos bida , pa Dios su intervencion.
Haci hopi oracion, y no obedece Dios no ta duna e resultado cu nos ta spera.
Nos ta keda manera un hende cu ta malo, cu ta bishita dokter, dokter ta duna remedi, pero ora e yega cas e no ta bebe remedi.
Hende cu ta haci oracion pidi Dios yudansa , pero nan ta sigi biba mesun cos y haci mesun cos contrali na boluntad di Dios.
Nan ta pidi Dios pa habri un porta , pa nan sali for di un problema, mientras cu nan actitud, nan ta demostra cu nan mes kier keda aden.
Hende nan cu ta bisa Senjor librami cu nan boca, pero cu nan bida nan no kier laga los.
Rogando Senjor pa trece pas den cas, pa e matrimonio por bira miho, pero nan mes ta esun di prome cu no kier pordona, y ta sigi pleita y murmura tur dia riba mesun cos.
Y hopi biaha ta cosnan di pasado , cual Dios a prohibi pa nos bay bek den nan . ( Isaias 43:18-19).
E asunto aki ta mas serio cu nos ta kere, pasobra si nos ta haci oracion na Dios, y nos no ta obedece Su Palabra, nos ta cargando awa hiba laman.
Pasobra obediencia na e palabra di Dios, ta e masterkey pa nos bida, pasobra Dios su palabra , ta e presencia di Dios.
Dios su palabra ta move tur montanja, ta kibra tur cadena, ta bay nos dilanti tur momento, y ta trece sanacion y liberacion den nos bida, basta nos obedece.
Si boso stima Mi, boso lo warda mi mandamentonan. Y lo Mi pidi e Tata y e lo duna boso un otro consolador pa e keda serca boso pa semper. ( Juan 14:15).
Si boso keda den Mi, y mi palabranan keda den boso, pidi tur loke boso kier, y esaki lo wordo haci pa boso. ( Juan 15:7).
Aki nos por mira e importancia di obediencia, pasobra caminda e palabra ta keda den hende, esey ta nifica cu tin obedencia na Dios, tur cos ta funciona cu obediencia, na Su palabra.
Ta imposibel pidi Dios yuda nos pa cana bay rechts y nos ta forsa tur manera cu nos bida y actitud pa nos cana bay links, e no ta bay funciona, ta tempo perdi, pasobra ningun hende no por papia un cos y haci otro cos, e sistema ey no ta traha cu Dios.
Esun cu tin Mi mandamentonan y ta warda nan, esey ta esun cu ta stima Mi. Y esun cu ta stima Mi ta wordo stima door di mi Tata, y Ami lo stime y lo manifesta Mi mes na dje.( Juan 14:21).
Y kico cu nos pidi nos ta ricibi for di dj’E, pasobra nos ta warda su mandamentonan y ta haci cosnan cu ta agradabel den Su bista.
Y esaki ta Su mandamento , pa nos kere den e nomber di Su Yiu Hesus Cristo, y stima otro mescos cu E a ordena nos.( 1 Juan 3:22-23).
Laga nos no cansa di haci oracion na Dios, pasobra hende nunca por bira independiente di Dios, nos tur mester di Dios, tur dia, tur momento, sin Dios nos no por haci nada.(Juan 15:5).
Sinceramente, Pastor Marcel Balootje
