E colegio di abogado na Aruba a emiti un comunicado unda nan ta elabora riba e publicacion di potret di hende riba websitenan di noticia. Den ultimo añanan a bira custumber cu websitenan ta publica potret di tur hende, sin tene na cuenta cu e victima, e sospechoso, e famia tambe tin derecho di privacidad.
Loke e ordo di abogado ta bisa ta cu nan a acumula reglanan pa tur nan miembronan cu ta abogado, pa den caso cu abogadonan kier cuminza defende e derecho di nan clientenan, cu nan por haci esaki cu un resultado exitoso, contra di websitenan di noticia.
Exegaracion, saca foto di hende scondi, sin tin permiso, publica foto di victima di accidente den forma di close up, tur esaki awor e persona cu sinti su mes afecta, por cuminza un caso contra dicho website pa pidi daño.
Sigur un “bon habri wowo”, pa tur hende: Esaki ta e comunicado:
E Colegio di Abogado di Aruba (“OvA”) a observa cu a pasa di periodismo clásico unda e noticia ta yega na publico principalmente di forma imprimi, pa e periodismo digital moderno cu imagen den su mayora “directo”.
Noticia, e nomer ta bisa tur cos, solamente ta noticianan cu ta implica un hecho nobo. Por lo tanto, un periodista kier ta e promer pa duna noticia y publica online lo mas pronto posibel. Sinembargo e Colegio di Abogado ta kere cu ta importante pa señala cu e primicia, no mester bay a costo e tur cos, sin tene consideracion y interes di otro.
Regularmente tin dos interes diferente den e informacion. Di un banda e interes di prensa, esta e libertad di prensa cual ta tambe e libertad di expresion, manera e articulo artículo I.12 di nos Constitucion di Aruba y den e articulo 10 del Convenio Europeo pa Protección di Derechonan Humano y e Libertadnan Fundamental (“CEDH”).
Di otro banda, tin e interes di e persona objeto di e denuncia, pa e respet di su derecho pa respeta su bida priva, familiar y di su famia, tal y manera ta poni, entre otros, den e artículo I.16 di Reglamento di Estado di Aruba y den e articulo 8 di CEDH.
Pensa, por ehempel, riba e personanan sospechoso di un crimen o delito, riba e autor y/o víctimas di un accidente y riba famianan den caso de fayeciminto.
E punto di salida ta cu ambos derecho tin e mes un peso, y ambos mester wordo respeta. Pero, si tin un boxmento entre e dos derechonan fundamental, mester haci un evaluacion di interes.
Jurisprudencia ta tene cuenta cu un serie di criterianan na momento di realisa un evaluacion di interes.
Na promer lugar, mester considera na ki midi un foto o publicacion ta contribui na e debate publico riba un tema di interes general. Na segundo lugar ta importante e papel of funccion di e persona implica y e naturalesa di actividad riba cual ta wordo informa.
Por ehempel, ta menos probabel cu un persona publico lo reclama e proteccion pleno di su bida priva, cu un persona no publico.
Pero incluso cu respet pa un persona publico, esaki tambe tin su limite, ora e material di imagen, y texto publica, ta referi exclusivamente na bida priva di e persona encuestion y tin e unico proposito di satisface e curiosidad publico.
Na di tercer lugar, e conducta previo di e persona encuestion ta importante, por ehempel si el’a busca publicidad su mes, esey por ta un factor pa tene na cuenta.
Na di cuater lugar, mester tene cuenta cu e metodo di publicacion y e alcance di e difusion di e material di imagen y texto. Den rednan social, por ehempel, e alcance di e difusion via e posiblidad di “share”, ta grandi, loke ta rekeri mas cuatela aun.
Por ultimo, ta importante sa, si e material visual cu a wordo graba, tabata abierto o scondi.
Asina huez lo aplica un prueba di necesidad y proporcionalidad y ta check si e reportero tabatin otro medio na su disposicion, cu mustra e persona den cuestion, completamente reconocibel den e imagen, di tal manera cu e no perhudica e publicacion y den menor forma, haci vulnerabel e derecho di proteccion di bida priva.
Mas frequentemente cu loke tin pensa, e publicacion di imagen sin edita, ( en directo) no ta necesario pa expresa e raportahe. Si no existi un necesidad, dicho publicacion ta wordo considera desproporcional y pa cu su objetivo pa informa publico.
Den caso di un accidente, por ehempel, ta basta cu describi e accidente, e danjo na e autonan y otro danjonan cu por tin, sin aserca e victima, pa asina protega si initmidad. Si e metodo di publicacion no ta cumpli cu e prueba necesario y proporcionalidad, y como resultado bini un invasion injustifica di privacidad di un persona envolvi den e informacion, e ora ey e publicacion ta ilegal y e persona por pidi derecho di compensacion ( inmaterial).
E Colegio di Abogado a traha riba algun norma di conducta pa abogadonan, pasobra kier propagada e etica serca abogadonan, cu na dado momento lo kier usanan den futuro caso.
Pa rasonnan similar, Asosacion di Periodista di Hulanda a adopta e Codigo di Periodismo.
Reglanan di Asisacion di Periodista di Hulanda ta bisa den puntonan:
- E periodista no lo invadi e intimidad di e persona, mas cu ta necesario den contexto di un raportahe abierto.
- E periodista ta respeta e intimidad di e victimas, di famia y pacient, pero tambe di sospechoso y di autor, evitando pa nan wordo reconoci.
- E periodista no ta publica textos o foto ni difundi di audio o imagenes di persona den situacion privada sin e consentimiento di e personanan afecta, a menos cu e publicacion tin un interes social importante.
