Como parti di e Common Good Conference di e siman aki, diferente organisacion riba Aruba ta comparti nan experencia y compromiso cu e bon comun. Entre nan tin un organisacion cu ta enfoca riba bienestar di adulto mayor, un grupo cu ta traha activamente pa aborda asuntonan relevante cu ta afecta e generacion di mas edad riba nos isla.
Segun Desiree Helder, e participacion den e conferencia ta un oportunidad importante pa crea mas concientisacion riba loke nan ta haci pa promove bienestar general di adulto mayor, tanto den area social, cultural como di cuido y dignidad.
“Nos ta participa den e Common Good Conference pa duna mas informacion riba loke nos ta haci pa bienestar general di adulto mayor na Aruba,” segun e representante.
E organisacion ta spera cu e conferencia lo sirbi como un plataforma pa conecta cu otro organisacion y instancia, pa fortalece comunicacion, crea relacion nobo y amplia colaboracion den e campo di common good. Segun nan, ora organisacionnan ta bin hunto, ta posibel logra un miho comprension di e reto cu e sociedad ta enfrenta y busca solucionnan cu ta beneficia tur hende.
E enfoke riba adulto mayor ta esencial pa un desaroyo social balansa, y e organisacion ta kere cu e Common Good Conference por contribui na un miho entendimento di con e cuido y integracion di adulto mayor ta forma parti di un sociedad sano y solidario.
E invitacion ta pa e comunidad participa activamente na e conferencia y expo, pa asina forma parti di e dialogo y contribui na un futuro unda bienestar, respet y dignidad ta central pa tur generacion riba Aruba.
