Den e sfera di liderazgo, e habilidad pa eherce influencia social ta surgi como uno definitivo. Fuera di autoridad tradicional, lidernan efectivo ta reconoce e poder di influencia social, ta fomenta colaboracion, y ta dirigi organisacionnan na exito.
Algo cu compania local Lead2Success sigur a bin ta haci desde nan fundamento na aña 2018. Funda pa Coach Francis A. Groeneveldt—un coach certifica di Liderazgo di John C. Maxwell, como tambe coach Financiero certifica di Dave Ramsey Solutions.
Motibo cual tambe Lead2Success a keda honra como un di e organisacionnan top den entrenamento transformacional a nivel mundial pa e organisacion ‘Successful Living Summit’ (SLS). Esaki a tuma luga durante nan evento di liderazgo anual cu e aña aki a tuma luga den Mexico City, Mexico.
SLS ta un Experencia di Liderazgo Transformacional diseña pa mehora e calidad di bida den areanan manera carera, relacion, comunicacion, amor y famia. Funda y crea pa keynote speaker Ever Miranda—un lider di negoshi y Invercionista. SLS, ta forma parti di e red internacional di Maxwell Leadership® di conocido experto y orado di liderazgo John C. Maxwell.
E evento a conta cu presencia keynote speakers, Ever Miranda y Nick Vujicic – conocido orado motivacional cu síndrome di Tetra-amelia – un trastorno raro caracterisa pa e aucensia di tur dos brasa y pia, kende a nenga di laga su circunstansianan defini’e.
“Esaki no ta algo cu mi a spera,” Coach Francis A. Groeneveldt ta duna di conoce. “Ora nan a yama mi dilanti, mi a keda den shock. E tabata un experiencia hopi humilde y muestra di aprecio pa cu tur e esfuerzo cu nos a bin ta haci. Toch di un of otro manera, kisas bo no ta wordo reconoci na bo mesun pais, otro si ta reconoce bo pa bo trabounan cu bo a bin ta haci,” Groeneveldt a expresa humildemente.
“Lead2Success a transforma un por medio di seis (6) mil cabes di cas cu nos cursonan di Finanzas, especialmente ‘Financial Freedom’ – cu ta un di esunnan mas nesesario den nos comunidad, tambe nos cursonan di liderazgo, benta, desaroyo personal y etica di negoshi, aki na Aruba durante ultimo 6 aña desde nos lansamento oficial na aña 2018,” Groeneveldt a resumi.
Durante e mesun encuentro aki tambe Lead2Success a keda oficializa como e representante oficial di SLS pa henter e area di Caribe. “Algo tremendo pa nos compania local. Lead2Success tambe ta e unico representante di Dave Ramsey Solutions den Caribe y awor tambe pa SLS Caribe.”
“Nos ta super contento cu e logro aki mirando e vision mutuo, pa cu transformacion di humanidad unda tambe SLS tin un vision pa transforma comunidadnan. Awor aki Lead2Success a subi un red di plataforma internacional, unda nos por mira crecemento y mas rikesa intelectual tambe pa nos isla.”
“SLS tin respaldo di Maxwell Leadership® como tambe, keynote speakers manera Nick Vujicic y otro aña tambe lo uni Jairek Robbins, yiu homber di conocido Tony Robbins. Mi ta sinti mi honra di por forma parti di SLS y hiba e siguiente nivel di curso y transmormacion y liderazgo den Caribe,” Groeneveldt a termina bisando.
