Departamento di ‘Organization, Governance and Management’ (OGM) di Universidad di Aruba ta organizando su ‘Research Conference’ den cuadro de celebracion di 15 aniversario. E conferencia, titula “Innovative Future of Governance in Aruba”, lo tuma lugar riba 18 y 19 di februari 2025 na Universidad di Aruba. E evento lo presenta orador renombra, tanto local como internacional den e tereno academico y profesional. E meta di e conferencia ta pa dialoga riba topico di gobernacion y innovacion cu e sosten di investigacion cientifico y asina contribui na e desaroyo di e organisacionnan den nos comunidad.
Algun di e oradornan ta Luciano Milliard (Universidad di Aruba), Ahmet Talan (Universidad di Aruba), Dr. Kristel de Nobrega (Centrale Bank van Aruba), Dr. Luc Alofs (Universidad di Aruba) cu lo representa e perspectiva local di gobernacion. Ademas di orador local, tambe ta yama bon bini na orador internacional esta, Prof. Dr. Mirko Noordegraaf (Universidad di Utrecht, Hulanda), Prof. Dr. Wieger Bakker (Universidad di Utrecht, Hulanda) y Dr. Stella van Rijn (Universidad di Kòrsou). E perspectiva internacional lo contribui na un dialogo amplio tocante gobernacion, liderasgo y invesigacion cientifico. Ademas lo tin e oportunidad di participa den sesion interactivo pa explora topico di e proyectonan di doctorado den e departamento. E sesionnan interactivo lo cubri e topico manera diversidad, gobernacion publico y profesionalismo den sector publico.
E conferencia aki ta hopi mas cu un celebracion – e ta simbolisa un oportunidad pa fortalece investigacion cientifico na Aruba y stimula inovacion den area di gobernacion na Aruba. E departamento di OGM ta considera e conferencia aki un oportunidad pa inova su plannan y anmbicionnan den e area di investigacion cientifico den colaboracion cu e participantenan. E participantenan lo haya e oportunidad di explora differente concepto, direccion y strategia cu e intencion di inspira inovacion. E evento ta specialmente destina pa inspira studiant, investigador cientifico y profesional den e terreno di gobernacion. Pa asina stimula un futuro inovativo.. Interesadonan ta invita pa registráa via e website di Universidad di Aruba www.ua.aw.
Nos ta invita comunidad di Aruba pa sigui nos departamento riba Facebook: University of Aruba: OGM y Instagram: @ogm_ua.
