Dia 31 di Maart 2026, riba e mesun dia cu mundo ta conmemora International Transgender Day of Visibility, Fundacion Orguyo Aruba ta expresa su profundo alegria y satisfaccion cu un decision historico di e Corte Comun di Justicia (Hof). Esaki despues cu Censo a apela un decision di Corte di Prome Instancia di Aruba, na unda cu Corte ta dicidi na honra un peticion di un persona transgenero pa cambia su sexo riba su acta di nacemento.
Hof ta dicidi cu tanten cu no tin ley na Aruba cu ta hasi posibel cambio di sexo den e acta di nacemento ora ta trata di transgender, ta na e hues pa dicidi den cada caso concreto, tumando na cuenta e contenido di e peticion y demas circumstancianan di e caso. Cu esaki Hof ta sigui e linea di Hoge Raad den casonan di neutralidad di genero.
Finalmente, Hof ta argumenta, identidad di genero ta cai bou di e derecho humano cu ta proteha bida priva manera ta stipula den articulo 8 di e Tratado Europeo pa Derechonan Humano. E articulo ta obliga e paisnan parti di e Tratado, incluyendo Aruba como parti di Reino Hulandes, pa legalmente reconoce e identidad di genero di personanan transgenero. Di esaki ta resulta cu personanan transgenero tin e derecho pa laga cambia indicacion di sexo riba nan acta di nacemento pa pone esaki cuadra cu e sexo cu nan ta experencia na un forma duradero.
Segun Orguyo, esaki ta un paso enorme dilanti pa igualdad y dignidad humano pa personanan transgenero na Aruba. Personanan trans na Aruba ta existi, nan identidad ta valido, y nan derechonan mester wordo respeta. Cu e decision aki, e Hof a pone Aruba mas cerca di un sociedad unda tur hende por biba cu dignidad y autenticidad.
Orguyo kier aclara si, cu cambio di sexo riba acta di nacemento ta rekeri un proceso. En todo caso mientras no tin reglamento den ley ainda, e persona mester presenta un peticion na Corte. E hues cu ta trata e caso mester yega na e conviccion cu ta trata di un sentimiento duradero y peristente cu e persona ta transgenero. Pa esey, generalmente lo ta necesario un declaracion di un experto medico cu ta confirma esaki.
Orguyo ta felicita e persona en cuestion cu a gana su caso y e comunidad transgenero na Aruba en general cu na e ocasion di International Transgender Day of Visibility, ta bai un paso grandi dilanti den nan derechonan.
