Un alerta na tur mayor y yiu.
Den e curpa di Cristo no ta existi grupo Elite, no tin V.I.P, nos tur ta sirbido,(Marco 10:35-45) pasobra Cristo Hesus a biba y muri y a subi completo na cielo, asina ta cu den Cristo Hesus no tin division. Ta un solo curpa nos ta.
Awor Mi ta exhorta boso, rumannan pa medio di e nomber di nos Senjor Hesus Cristo, pa boso tur papia mesun cos, y pa no tin division entre boso, ma pa boso ta perfectamente uni den e mesun mente, y den e mesun opinion.( 1 Corintionan 1:10).
No haci nada cu un actitud di egoismo of orguyo, ma cu humildad,laga cada un di boso, considera e otro mas importante, cu e mes, no busca boso interes personal so, busca tambe interes di otronan.laga tin den boso e mesun actitud aki, cu tabatin tambe den Cristo Hesus.( Filipensenan 2:3-5).
No tin otro Fundeshi cu no ta Cristo Hesus, no tin otro Baranca, E ta e cabes di tur cos, Cristo Hesus a bisa ,bay den henter e mundo y predica e evangelio na tur criatura , esey ta nifica cu mientras cu nos no logra esey, no tin nada di broma ni tampoco nada di competi.
E spirito di competencia y grandesa ta drenta, ora nos habri porta di nos curason pa orguyo drenta, pasobra orguyo ta pone nos pensa cu nos un ta mas cu otro.
Hopi hende no ta kere pero e diabel ta asina mentiroso cu e ta trece competencia hasta den cas di famia, entre esposa y esposo, tambe entre yuinan, y su meta ta pa causa division.
Corda bon locual CrIsto Hesus a pidi su Tata pa nos: Mi no ta pidi bo pa esaki nan so,ma tambe pa esnan cu ta kere den Mi,pa medio di nan palabra,pa nan tur por ta uno, mescos cu Abo,O Tata ta den Mi y Ami den bo, pa nan tambe por ta den Nos, pa mundo por kere cu ta Abo a manda Mi.
E unidad cu nos mester tin den Cristo Hesus, ta algo hopi grandi y serio , pasobra esey ta boluntad di Dios pa nos tur. Pasobra ta para scirbi den Romanonan 16:17-18 : Awor mi ta roga boso,rumannan tene na bista, esnan cu ta causa division y strobacion contrario na e ensenansa cu boso a hanja, y aparta boso for di nan.Pasobra sorto di hende asina ta esclavo no di Senjor Cristo,ma di nan mes apetit,y cu nan palabranan suave,y agradabel, nan ta ganja curason, di e inosentenan.
Tur reino dividi contra su mes ta keda ruina,y un cas dividi contra su mes ta cay,( Lucas 11:17).
Den e ultimo tempo lo tin bofonadonan cu ta sigi tras di nan mes pasion perverso. Esakinan ta esnan cu ta causa division, hendenan sensual , cu no tin e Spirito.( Judas 1:18).
Nos tur a ricibi di Dios, pa nos por sirbi Dios, y den ningun caso Dios no a duna nos un Spirito di competencia, pero den tur cos nos mester completa otro pa asina e nomber di Cristo por wordo halsa.
Si un hende bisa: Mi ta stima Dios, y ta odia su ruman, e ta un ganjado,pasobra esun cu no ta stima, su ruman cu e a mira,no por stima Dios, Kende e no a mira.( 1 Juan 4:20).
Orguyo ta trece falta di pordon, rechaso, discrimacion,y falta di respet y den Curpa di Cristo no tin lugar pa esey,
Dios ta misericordioso, amoroso y yen di compasion.
Grandi ta nos Senjor y nos tur ta Su sirbido.
Sinceramente, Pastor Marcel Balootje
