Recientemente HOH-Academy di Horacio Oduber Hospital (HOH) a duna inicio na e opleiding di Klinische Neurofysiologie Laborant (KNF). Pa prome biaha, studiante Arubiano lo por sigui e formacion aki localmente pa bira laborant di KNF. E ta un trayecto cu un duracion di 3 aña cu ta wordo ofreci den colaboracion cu LOI. Walmaira Oduber, Zorgmanager Functiekamer na HOH: “mi ta hopi orguyoso di por guia un studiante yiu di tera pa e por obtene su diploma di KNF Laborant mirando cu awo HOH tin tur acreditacion pa por guia e studiante.”
Aqmar Abraham, Docent coördinator na HOH-Academy, a bisa cu orguyosamente ta inicia cu un Post-bachelor Opleiding y di e manera aki ta duna oportunidad na un studiante cu tin HBO cu “exact pakket” pa haci e opleiding den hospital na Aruba mes. Pa motibo di e deficiencia cronico mundial cu tin den diferente funcion den cuido, mester duna e studiantenan cu tin HBO mas oportunidad pa crece. Si un studiante a termina un bachelor di HBO, e trayecto por wordo minimalisa pa dos aña.
Den futuro lo bay brinda oportunidad na e studiantenan cu termina HAVO y VWO cu “exact pakket” pa continua cu e estudionan aki. Y lo ta un educacion reconoci mirando cu HOH lo traha conhuntamente cu LOI y asina e studiantenan por eherce nan examen di teoria y practica na Aruba mes y sigui brinda nan conocemento na Aruba mes na nos pashentnan.
Un laborant di KNF ta investiga fenomenonan y desviacionnan neurofisiologico cerca pashentnan. Cu ayudo di aparato avansa, e laborant ta midi e funcion di e cerebro, nervionan, musculonan vena nan di sanger.
Madeline Martinus, studiante pa KNF Laborant, a comenta na momento cu e vacatura a sali ela dicidi di bay p’e. Madeline ta hopi contento di por ta e prome studiante den Caribe Hulandes cu a haya e oportunidad aki pa studia KNF Laborant.
Agnes van der Vloet, ta un KNF Laborant pa 20 aña na HOH, a expresa cu e ta masha contento cu e aña aki a logra e acreditacion pa e Klinische Neurofysiologie pa henter Caribe Hulandes. Esaki ta un logro grandi mirando tambe e deficiencia pa Laborante di KNF. Y mas contento ainda cu HOH ta e unico den Caribe Hulandes cu por ofrece e lesnan aki. Desde 1 di juni un colega ta start cu e estudio aki y ta spera cu den 2 aña e ta cla y por cuminsa traha.
Cu e paso aki un bes mas Hospital di Aruba ta sigui enfoca riba un di su fundacionnan cu ta “continuous learning” unda educa su propio personal pa por brinda mas y miho servicio na su pashentnan ta un prioridad.
