E oro cu tin riba e Gouden Koets, por ta bini di Suriname, segun un investigacion nobo haci pa Amsterdam Museum. Segun e Museo, e investigacion aki a resolve e misterio.
Desde masha tempo caba, ta ser bisa cu e oro di e Gouden Koets ta bini di Aruba. Por ta bien posibel, pasobra den e anjanan ey, Hulandesnan a haya conesecion y tabata extrae oro di nos suela y tabata manda Hulanda.
Den e relato cu a wordo duna, Amsterdam Museum ta bisa cu nan a investiga e oro pa mira si e ta parce di Africa of di Surinam, sinembargo nan NO ta menciona si nan a compara e oro cu esun di ARUBA. Esaki ta pone SOLO DI PUEBLO conclui cu mientras no haci e comparacion cu oro di Aruba, no por saca conclucion final.
Esey ta indicacion cu e ainda ta keda un misterio, si encaso e ta di Surinam of por ta di Aruba.
E investigacion a wordo haci dor di Vrije Universiteit Amsterdam, Netherlands Institute for Conservation+Art+Science+ y Naturalis Biodiversity Center.
E investigacion a wordo haci dor di tuma poco muestra di e oro di e Gouden Koets, dor di kita algun miljard di particula. Djey nan a compara e pida oronan cu oro di Africa y di Surinam, y e pida oronan ta parce mas tanto na oro di Surinam, for di un mina e tempo aya, na un riu di Surinam.
E investigador ta haya cu PROBABLEMENTE, cu tempo cu e Gouden Koets a wordo traha, tabata extrae oro for di e mina na Surinam.
E resultado di e investigacion ta bisa cu PROBABLEMENTE e oro ta di Surinam.
SOLO DI PUEBLO ta kere cu esaki ta lanta e pensamento cu no por descarta cu berdaderamente e oro por ta di Aruba, mientras cu e investigacion no a haci e comparacion cu oro di Aruba, cual tambe tabata wordo exporta pa Hulanda den mes añanan cu e Gouden Koets a wordo traha.
