Diasabra ultimo, Impact Hub Aruba, Universidad di Aruba y Camara di Comercia a finalisa O’STAD200 Incubator den gran forma. O’STAD200 Incubator ta un program inovativo cu ta brinda un Plataforma di training, workshop y guia pa personanan cu ta aspira di cuminsa of crece un negoshi pa ta miho prepara. E proyecto aki a wordo desaroya pa Impact Hub, cu colaboracion di Universidad di Aruba, Camara di Comercio, y sosteni pa Ministerio di Asuntonan Economico, Comunicacion y Desaroyo Sostenibel.
Despues di un registracion di 42 compania, 20 compania a wordo accepta, di cual 16 compania, consistiendo di 12 ‘start-ups’ y 4 ‘scale-ups’ a logra finalisa e trayectoria di incubacion. Pa 4 luna incubators a pasa door di un periodo intensivo di training, workshop, networking y mentorship, y asina a adkiri tur recurso necesario pa establece of transforma un compania sostenibel y cu ta crea impacto pa comunidad y comercio.
Durante sessionnan intensivo di Pitch, un panel di ‘Sharks’ a scucha tur 16 Pitch di compania y a evalua cada compania segun nan capacidad di resolve un problema, potencial den mercado, model di negoshi, nivel di inovacion, factibilidad financiero, potencial di crecimento, sostenibilidad y impacto di e compania.
E comishon organisatorio di O’STAD200 Inucbator ta sumamente orguyoso di e crecemento di tur participante riba nivel professional como tambe personal. Segun Sra. Mary-Ann Falconi-Rasmijn, co-founder y General Manager di Impact Hub Aruba, ta splica cu ta hopi remarcabel di con hopi ‘entrepreneurship’ ta biba den nos comunidad. “Entrepreneurship ta realmente un manera di pensa cu ta permiti un persona identifica oportunidadnan activamente, tin e curashi di tuma iniciativa, y tuma retonan cu un nivel halto di creatividad y ablidad di resolve un problema.” Sra. Falconi-Rasmijn ta splica. “E ta un satisfaccion grandi di wak con ‘O’STAD200 Incubators’ tabata tin tur capacidad di wak mas leu cu solamente solucionnan convencional y ta dispuesto di tuma riesgo pa inova of mehora sea un proceso, producto of servicio”, e ta añadi.
Na final di e dia, un panel di 7 ‘Sharks’ a saca e ganadornan den cada categoria di ‘Start-up’ y ‘Scale-up’, y tambe a otorga 6 premio adicional di ‘Most Innovative’, ‘Most Sustainable’, ‘Most Impactful’, ‘Most Scalable’, ‘Most Aspiring’, y ‘Fan Favorite’. Cada ganador maximo a gana AWG 10.000, y pa e premiacionnan adicional tambe tabata tin premio efectivo.
E ganadornan a resulta di ta:
Most Innovative: Denzo Design, founder Densay Hernandez
Most Aspiring: Laycro N.V., founder Lionel Croes
Most Scalable: Wise in Motion, founder Kevin and Aaron Bislip
Most Sustainable: Lovemade Organics, founder Gianira Maduro
Most Impactful: Quero, Aroma, Arte Botanicals & More, founder Lucette Strijdhaftig
Ganador absoluto Start-Up: EdenEmbrace, founder Elise Maduro-Ras
Ganador absoluto Scale-Up & Fan Favorite: Logopedie Oduber, founder Celina Oduber
Ta di remarca cu e premionan aki no solamente ta resalta e capacidadnan di nos entrepreneurnan local, pero ta establece un standard nobo pa inovacion y impaction pa Aruba su economia local.
O’STAD200 Incubator ta sumamente satisfecho di e trayectoria y e resultado logra pa cada incubator. Tur participante a demostra dedicacion, resistencia y e capacidad di logra nan meta. Mester enfatisa cu esaki ta solamente un comienso cu un fundeshi solido, pero e trabou real ta bay rekiri dedicacion continuo, consistencia y disciplina pa logra metanan di crecemento di un compania.
Un palabra di gradicimento ta bay pa tur sponsors, Setar N.V., WEB Aruba N.V., Elite Aruba, Toyota Aruba, Aruba Experience, VNO, Aruba Tourism Authority, AHATA, Bold Bizz, Blue Aruba, Qredits, and Guardian Group, cu a yuda haci O’STAD200 Incubator un realidad. Un palabra di elogio ta bay na tur 40 voluntario cu a aporta cu nan experticio como facilitador, tur 16 mentors cu a haci un trabou excepcional den guia tur incubators. Tambe ta gradici staff y personal di Impact Hub Aruba, Universidad di Aruba Center for Lifelong Learning, y Camara di Comercio pa tur colaboracion y dedicacion den e ultimo 10 lunanan.
E exito di O’STAD200 Incubator ta reafirma e compromiso di Impact Hub Aruba, Universidad di Aruba y Camara di Comercio, pa fortifica e ecosistema di ‘Entrepreneurship’ na Aruba. Co sosten continuo di parti di comunidad, Gobierno y Comercio, O’STAD200 Incubator por continua crea impacto, inspirando y duna oportunidad na future generacionnan di entrepreneurs Arubiano pa logra establece un posicion den economia local y global.
Tocante O’STAD200 Incubator Program
E O’STAD200 Incubator Program ta dedica pa empodera y equipa e entrepreneursnan Arubiano cu e abilidad, conosemiento, y resursonan ku nan ta nesesita pa crese y tene exito. Via un programa riguroso di 4 luna, e participante nan ta haña mentoria, entrenamiento, y acceso na un red di sosten cu ta drecha nan ideanan di negoshi di consepto pa realidad. Por bishita www.ostad200.com pa mas informacion.
