Miembro di Parlamento pa AVP, Otami Thomasia, ta duna claridad tocante su reaccion relaciona cu e situacion di diadomingo durante e celebracion di Sinterklaas y Zwarte Piet. Segun Thomasia, su preocupacion y disgusto ta contra elementonan den e tradicion cu por crea un imagen ofensivo y malo pa mucha y adulto igual.
Thomasia, kende a crece na San Nicolas y ta “di pariba di brug”, ta bisa cu e no ta di acuerdo cu e celebracion riba su mes, pero ta comprende con otronan ta scoge pa wak e cu mas inocencia. Si un persona kier bisti cu e paña tradicional, esey ta su derecho, pero ora bo agrega atributonan cu ta indica raza—como peluca, color preto intenso, lipnan cora—ey si ta pasa un liña,” e ta splica.
E parlamentario di AVP ta enfatisa cu no por ignora e simbolismo tras di e rasgonan visual ey. Segun Thomasia, esaki ta crea mensahe subliminal cu por duna mucha un sintimento di inferioridad. Te dia di awe e ta duna pia pa hopi termento na scol, muchanan cu ta sinti cu ta sinti cu nan ta menos, pa e color di nan cuero y cu, cu tempo, por hiba na problema di salud mental.
“Ami mes ta un persona di color cu ta para firme riba su identidad. No tin nada di mi cu ta bisa cu mi tin un compleho, pero awo mi ta carga un funcion caminda mi por papia pa hopi cu no tin plataforma of voz.”
Thomasia ta pidi comunidad pa bay riba e post di media social di declaracion y lesa e comentarionan cu a bin, pasobra segun e, nan ta revela e realidad cu no por keda scondi; e realidad di con y kico hopi hende ta pensa ainda.
“E criticanan ta mustra claramente dicon e tradicion, den su forma actual, no ta pas mas. Nos a drenta 2025; nos rumbo mester cambia. Tradicion mester evoluciona pa ta inclusivo y pa honra tur mucha, sin exclui, ni ofende.”
E ta aclaria cu su comentario no ta dirigi contra Minister Mike Eman of e team cu a organisa e evento, pero si ta recorda cu tin un palabracion ya pa un par di aña pa pinta e pietnan na diferente color. “Si un hende sa cu e simbolo ta ofensivo y toch ta scoge pa schmink su cara preto, e ta haci un decision personal. Pero nos, como comunidad, tin cu wak mas leu.
Diadomingo ultimo no tabata e prome presentacion di e grupo y den pasado a respeta e acuerdo di e manera con Piet mester mustra. Asina mes, y sin cu e organisadonan tabata consciente, a scoge pa uza toch e apariencia cu mayoria a rechasa. Esaki ta bisa hopi di e falta di empatia cu ainda tin pa esunnan cu no ta sinti comodo cu e tradicion, of cu ta sinti afecta pa motibo cu su simbolismo ta carga un dolor historico. Un decision asina no ta inocente; ta mustra cu e sensibilidad di otro no ta tuma na cuenta.
Thomasia ta conclui cu un yamada pa wak dilanti y pensa riba e generacion nobo. “Aruba, pensa pa nos muchanan. Nos tin hopi otro celebracion bunita cu nos por amplia: Dia di Mucha, por ehempel, por bira un fiesta na gran escala, un evento di alegria y union. Ta ora pa tradicionnan nobo cu ta inclusivo, cu ta refleha ken nos ta como pueblo.”
