Awe mainta Parlamentario Otmar Oduber a cuminsa un caso contra Gobierno di Aruba, Parlamento y tambe Alfred Sneek, Jennifer Reyes, Evelyna Croes y Gino Goeloe. Abogadonan mr. Illes y mr. Carlo a representa Oduber.
SOLO DI PUEBLO por a compronde cu e caso ta pa Hues ordena Gobierno y Parlamento kita e decision di 20 Maart 2025 caminda ta prohibi Otmar Oduber viaha pa diferente actividadnan Parlamento.
REUNION IMPORTANTE DI REINO
E abogadonan di Oduber ta haya cu e decision aki ta haci cu e 3538 votadornan di Oduber riba lista di PPA, no ta wordo representa completo y efectivo den Parlamento di Aruba. E abogadonan a bisa Hues cu door di exclui Oduber, un gran parti di comunidad ta wordo nenga. Esaki ta trece cune un deficiencia democratico cu e risico cu un parti di comunidad ta perde confianza den e proceso politico. Esaki ta mina e proceso democratico y e efectividad di Parlamento den su totalidad.
E abogadonan a mustra cu otro luna, September 2025, tin un reunion Interparlamentario di Reino (IPKO) y ta inacceptabel cu door di e decision di 20 Maart 2025, Oduber no por participa. Na opinion di e abogadonan, asuntonan importante pa Aruba lo wordo trata den e reunion (IPKO) y fraccion di PPA, representando tur e votadornan, no por expresa su mes den e forum crucial aki.
NO POR TUMA MEDIDA CONTRA ODUBER
E abogadonan ta haya cu Comision Central ta viola e principio di legalidad ya cu no tin base legal pa e decision di 20 Maart 2025.
E abogadonan a mustra cu den pasado, Legislacion conciente a scoge den e LIM (Landsverordening Integriteit Ministers) e (AB 2021 No. 2023) pa tuma medida contra ministernan cu ta wordo sospecha di a haci cosnan castigabel. Na opinion di e abogadonan, Parlamento no tin e ley aki y como tal no ta aplicabel pa e Parlamentarionan. E abogadonan ta haya cu Comision Cental no por tuma e medida contra Oduber.
E abogadonan a mustra cu Oduber a protesta contra e medida aki pero sin resultado.
A BOYCOT PARLAMENTARIO NA CURACAO
E abogadonan a mustra riba un caso na Curacao di 2020 caminda a boycot e nombramento di un Parlamentario nobo. Den e caso ey, Corte di Curacao a señala cu tabatin un boycott cu no tabata basa riba hechonan legal. Hues di Corte di Curacao ta haya cu e derecho di voto di e votadornan ta wordo viola.
E abogadonan ta haya cu ta e mesun situacion tin cu Oduber.
PROHIBI GOBIERNO Y PARLAMENTO
E abogadonan ta haya cu tin motibo di urgencia den e caso aki y ta pidi Huez pa prohibi Parlamento y Gobierno, usa e decision di 20 Maart 2025, contra Oduber y pa Hues ordena Gobierno y Parlamento pa laga Oduber por atende tur reunion y actividad Parlamentario. Tambe e abogadonan ta pidi Hues pa ordena Gobierno y Parlamento pa Oduber por forma parti di comisionnan y representacion internacional.
Despues di a scucha e defensa di parti di Gobierno, Hues a bisa cu e ta bay studia e caso y dia 7 September 2025 lo tin sentencia.
