Awe mi ta desea di dirigi mi mes na e comunidad di Aruba cu un caso cu mi ta califica un poco insolito. Ministro Ursell Arends cu un Campanja nacional di Limpiesa, mientras cu pa mas di 3 aña nos no por a wak e, el a keda scondi den Cocolishi, despues di a sera Dump di Parkietenbos lagando tur hende pega y cu costo halto den benta sushi afor.
Mi ta desea haci’e e siguiente preguntanan publicamente.
Mi kier puntra Minister demisionario Ursell Arends: cuanto tonelada, kilo of liber di Tire a wordo recycla na Aruba, Cuanto tonelada, kilo of liber di Plastic a wordo recycla, cuanto tonelada, kilo, of liber di Palette, green waste a wordo recycla. Cuanto tonelada, kilo of liber di material Tech Waste of glass bo a recycla? Kiko a para di e projecto Trash To Cash pa a duna oportunidad na iniciativanan nobo di hobenan y nan compania.
Nada, nada nada.
Te awe, ningun raport, ningun comunicado a sali di e ministerio of di Serlimar tocante e projecto pa crea un industria di recyclahe y upsycle.
Mas bien a dal dump sera sin ningun plan. Den weekend e pueblo di Aruba a keda sin lugar unda pa hiba nan desperdicio. Lamentablemente hopi a haya nan forsa pa benta sushi unda cu ta cual sigur no ta corecto. Pero ta e propio ministro aki cu ta sinta su so den su oficina y no ta resolve problema, no ta goberna.
Durante e weekend cu a caba di pasa a haci un show di Accion Nacional di Limpiesa pa purba drecha tipo pa campanja y eleccion. Derepente ta core cu bicycleta den barionan. 3 anja largo bo no a preocupa cu e pueblo di Aruba, ni cu esnan cu ta biba den e barionan mas afecta.
Awe 3 siman promer cu eleccion Raiz a Sali for si cocolishi.
Awe Aruba ta biba e consecuencianan di un ministro cu no kier a scucha. Ami si a scucha, ami si a reuni cu tur e departamentonan concerni, ami si a pidi expertonan di Aruba studia e problema di desperticio di Aruba y bin cu plan pa nos por genera coriente for di desperdicio. Pa e problemanan a corto plazo pa para e molester di musca y holor malo den e barionan mi a laga busca un incenerator cu a haci su trabao. Pero despues e ministro aki, contra conseho di DOW a stroba e incenerator pa funciona. Awe Aruba ta biba cu e consecuencianan di su mal maneho.
E unico cu el a haci ta laga ECO Gas , contra deseo di miles di e habitantenan, sigui dera sushi na Seri Teishi, algo cu mester tabata temporal.
Pues bon haci nada, bo no a haci nada nada nada. Ta con bo kier bin core bicicleta den e barionan pa pidi pa nan voto, cu ki cuero di cara.
Ami si a traha riba un plan total y mi a cuminsa actua riba e plan na caminda pa e ley di Serlimar pasa den Parlamento. Pero wak awe, el cu su amigonan a percura pa Serlimar ta moribundo y te awe e no a percura pa e ley bin den Staten pa wordo pasa.
Si mi haya e apoyo di nos comunidad den e proximo eleccion ami si lo no papia pero haci, manera semper mi a cumpli cu ne durante mi periodonan como ministro den gobernacion.
