Cu e palabranan fuerte aki lider di fraccion di PPA, Parlamentario Otmar Oduber, a referi na un Rijkswet Financieel Toezicht Aruba cu tres fraccion den parlamento ta nenga di atende cune. Desde un principio a propone un Frente Nacional y ainda ta sigi boga pe. El a comenta cu tur hende sa den e caso aki cu tin un entiero (1 Mei) pero esnan den gobierno actual no kier anuncia ainda e morto (RAFT nobo?) den e caso aki. E otronan cu ta formando e gobierno no kier papia di e defunto (RAFT biew of nobo) pero na final di dia ta pueblo tin di bay entiero, osea paga e consecuencianan di e Rijkswet aki cu lo keda imponi pa Hulanda. Parlamento ta un organo cu ta carga un responsabilidad di defende interesnan di e pueblo y mester actua tambe independiente di gobierno.
“Nos ta na un momento unico aworaki pa unifica Parlamento pasobra no ta cuestion di mustra dede den direccion di niun partido of politico, sino di para pa e derecho constitucional di nos pueblo y e estado di derecho cu tanto a worde lucha pe”, asina e lider di fraccion oranje a duna di conoce. Tin un gobierno cu ta saliendo, uno cu ta bay drenta y tin PPA cu a bin cu e proposicion aki pa unifica tur, cu e meta di bay Hulanda awo caba y no ora bin e polarisacion pasobra un gobierno nobo a sinta y oposicion ta bay bringa tur loke e gobierno aki kier presenta.
P’esey kier un reunion publico cu a eorde pidi mas cu un luna pasa cana, pa yega na un mocion unda cu ta trece aden tur gremio, e diferente instancianan hunto cu gobierno, crea un frente y bisa Hulanda unda nos como nacion kier bay, pero cumpliendo claro cu reglanan y normanan cu nos por ancra den nos propio leynan local. Hulanda mester compronde y realiza cu Aruba semper a cumpli cu su obligacionan y nunca a pidi un regalo. Al contrario a paga bek semper su debenan na Hulanda y otronan. Cu gobiernonan a faya den cumplimentonan cu nos reglanan financiero y cu nos a haña nos mes confronta cu un pandemia cruel ta un hecho, pero esaki no por bai a costo di nos derechonan constitucional adkiri. Hulanda mester worde convenci cu nos tin e madurez pa cumpli cu un refinanciamento di nos debe total y no solamente di e pandemia. Nan mester compronde cu nos tin leynan suficiente unda nos por pone normanan cu por gatantiza cumplimento di e refinanciamento aki. Pero esaki sin tin cu mete den nos derechonan adkiri y respetando e estado di derecho independiente dentro di Reino cu no solamente nos a scohe pe, pero cu nos a acorda tambe riba dje entre tur e partnernan den Reino. Aruba lo mester combini “eikmomenten” unda por regularmente midi “toets” e normanan cu nos mes a inclui den nos leynan local acopla na institutonan cu tin cu monitoria y controla e trajecto aki mientras ta logra e metanan proponi. Fraccion di PPA den Parlamento lo bokbe manda un carta pa Presidente di Parlamento urgiendo su persona pa jama e reunion publico aki mas pronto cu ta posibel, mirando e impacto enorme (negativo of positivo) cu e ley di Reino aki por tin riba nos comunidad.
