Caso Avestruz a cuminza lanta cabes. Di acuerdo cu informacion cu SOLO DI PUEBLO tin, ta bisa cu dialuna mainta un homber di faam F. a wordo deteni, cual a bin resulta di ta Jeff Franken, bao sospecho di ta meti of tin informacion importante pa comparti cu husticia. Pa 11.27 di mainta, Ministerio Publico a confirma esaki na Solo di Pueblo.
Esaki ta e dos detencion cu a tuma lugar, cuminsando desde ayera, ora cu yiu muher di Leoncita Arends, doño di Canal 90, a keda deteni na airport saliendo for di Aruba.
Informacion cu SOLO ta dispone di dje ta bisa cu e caso ta uno hopi grandi y por spera cu hopi mas persona lo wordo yama pa husticia y lo wordo invita pa bishita landsrecherche pa asina comparti informacion cu nan tin.
Pa loke ta trata Jeff Franken, su nomber ta aparece den e compania Elenath Nv. Sinembargo algun aña pasa, ora SOLO a trece e noticianan aki dilanti, .Jeff Franken a contesta nos medio di comunicacion cu el’a traspasa e compania aki pa Sra. Leoncita Arends y e no tin ni arte ni parte di haci cu loke a sosode despues den e compania Elenath Nv.
Ministerio Publico te cu awor no a emiti ningun comunicado di prensa, pero via otro medio a confirma cu e caso a cuminza lora.
