E entusiasmo di e comerciantenan den Caya Grandi ta halto pa e evento di Ban Bek Caya. Varios comerciante bin cu oferta y promocion atractivo durante Ban Bek Caya edicion 4 cu a duna bon resultado.
Ban Bek Caya ta un iniciativa di Gabinete AVP-Futuro pa trece bida bek den Caya Grandi y duna un impulso economico pa e comerciantenan estableci den Caya Grandi. Cada biaha esaki ta bira mas grandi y e comerciantenan ta mira e efecto di esaki. Hopi ta esnan cu a probecha di e orario y ambiente pa haci nan compras y probecha di e bon ofertanan cu mayoria comerciante ta ofrece.
Algun tienda a prepara y adapta pa asina brinda e cliente e miho experencia durante e actividad. Por a mira tambe cu diferente establecimento a pone mesa y stoel parti pafo di nan localidad pa asina nan cliente por sinta y disfruta di bon cuminda, ambiente y topa cu amistad den centro di ciudad.
A combersa cu entre otro representantenan di Penha, Dufry, SportStar, Watapana Dance Company, Mint Lime & Beans y Old Dutch Pastry cu a duna tremendo feedback di locual tabata espectativa y benta pa e anochi aki.
Algun a tuma iniciativa di drenta caya grandi cu nan special cake baskets pa promociona nan localidad, otro a prepara booth cu 50% di descuento, algun a haci demostracion y habri inscripcion pa nan grupo di baile, a prepara terasa cu ambiente festivo y mas.
Comerciantenan ta mira atras riba un bon dia di benta, contento cu porfin tin movecion y benta, clientenan cu a pasa e dia siguiente tambe pa continua cu nan shopping y positivismo di tur cu ta forma parti di e evento. Comerciantenan ta gradici Gobierno pa e esfuerso y tur partner envolvi pa trece hende bek den caya y empuha comercio di Caya Grandi.
