Diahuebs 4 di juli, Prome Minister Evelyn Wever-Croes a atende un presentacion di Aruba Wastewater Sustainable Solution (AWSS) unda a mustra e plannan di e compania estatal pa e mehoramento di RWZI (Rioolwaterzuiveringsinstallatie).
![](https://solodipueblo.com/wp-content/uploads/2024/07/MP-AWSS-Proyecto-planta-RWZI-Bubali_-3-683x1024.jpg)
Prome Minister ta remarca cu e dia aki ta uno importante pa Gobierno y pa Aruba ya cu por mira AWSS, cu ta e compania encarga cu RWZI, bira un realidad. AWSS ya ta funcional desde prome di juli 2024, y e proyecto ya a inicia pa locual ta e planta di Bubali. E mandatario ta sigui bisa cu durante e presentacion, por a mira e historia di e planta di Bubali cu ya tin 52 aña sirbiendo nos pais. Aruba a crece hopi durante a añanan aki, pero e planta no a crece cu ne. Awor cu RWZI ta den man di AWSS, e planta lo bay crece y mehora.
![](https://solodipueblo.com/wp-content/uploads/2024/07/MP-AWSS-Proyecto-planta-RWZI-Bubali_-2-1024x683.jpg)
AWSS lo cuminsa cu instalacion di e “Aeriation System” y e “Granular Sludge System” nobo na e planta di Bubali. Ya 4 siman despues di instalacion di e sistemanan aki lo conoce un reduccion di 80% di e holo y 12 siman despues Aruba lo conoce un alivio total (100%) di e holo di awa pafo di e planta. Tambe lo instala un sistema di control na e planta di Bubali cu tin e capacidad pa pronostica cualkier problema y actua riba dj’e preveniendo cualkier situacion den futuro.
![](https://solodipueblo.com/wp-content/uploads/2024/07/MP-AWSS-Proyecto-planta-RWZI-Bubali_-1-1024x683.jpg)
Prome Minister ta menciona cu e dia aki, unda alfin por wak e solucion pa e problema actual di RWZI Bubali, ta un dia grandi pa Gobierno di Aruba y pa tur ciudadano di Aruba. E mandatario a gradici coleganan Minister Ursell Arends y Minister Glenbert Croes cu a traha duro desde inicio riba e privatisacion y a logra. Tambe el a gradici Utilities Aruba N.V. cu a yuda Gobierno yega na e solucion y DOW cu pa 52 aña a atende tur e problemanan di e planta actual.
![](https://solodipueblo.com/wp-content/uploads/2024/07/MP-AWSS-Proyecto-planta-RWZI-Bubali-8-1024x683.jpg)
“Mi ta felicita y manda palabra di exito na e empleadonan di DOW cu antes a traha cu e planta y awor a bay over pa AWSS. Di curason mi kier gradici pueblo di Aruba pa e pasenshi pasobra esaki ta algo cu ta afecta tur ciudadano di e pais aki y specialmente esnan cu ta traha den e area cerca di e planta.
![](https://solodipueblo.com/wp-content/uploads/2024/07/MP-AWSS-Proyecto-planta-RWZI-Bubali-7-1024x683.jpg)
Ami ta considera esaki un di e logronan mas grandi di e Gobierno aki. Nos no a realisa tur nos metanan ainda pero nos ta logrando si”, Prome Minister a remarca.
![](https://solodipueblo.com/wp-content/uploads/2024/07/MP-AWSS-Proyecto-planta-RWZI-Bubali-5-1024x683.jpg)
![](https://solodipueblo.com/wp-content/uploads/2024/07/MP-AWSS-Proyecto-planta-RWZI-Bubali-3-1024x683.jpg)
![](https://solodipueblo.com/wp-content/uploads/2024/07/MP-AWSS-Proyecto-planta-RWZI-Bubali-1-1024x681.jpg)
![](https://solodipueblo.com/wp-content/uploads/2024/07/DSC7160-1024x683.jpg)
![](https://solodipueblo.com/wp-content/uploads/2024/07/DSC7019-1024x683.jpg)
![](https://solodipueblo.com/wp-content/uploads/2024/07/DSC7010-1024x683.jpg)
![](https://solodipueblo.com/wp-content/uploads/2024/07/DSC6899-1024x683.jpg)
![](https://solodipueblo.com/wp-content/uploads/2024/07/MP-AWSS-Proyecto-planta-RWZI-Bubali_-6-1024x683.jpg)