ORANJESTAD – Minister di Turismo y Salud Publico Sr. Dangui Oduber ta repasa riba e trabounan di siman pasa. E tabata un siman hopi productivo caminda hopi trabounan a wordo haci pa progreso y bienestar di nos comunidad. Manera custumber minister Oduber ta informa comunidad kiko tur a wordo haci den e siman tras di lomba den su ministerio.
Dialuna siman pasa Minister Oduber a anuncia e proyecto di embeyecimento di Hooiberg. Hunto cu ATA lo construi un mirador nobo na e top di Hooiberg pa asina nos local u turistanan por disfruta di un bista di 360 grado di nos isla. Tambe hunto cu TPEF lo drecha e trapi nan di Hooiberg hacienda uzo di nos artistanan local cu lo duna e trapi un toke artistico por medio di mosaic. E meta ta pa Hooiberg bira un atraccion colorido pa localnan y turistanan. Di e manera aki ta crea un atraccion nobo pa nos bishitantenan y eleva producto Aruba.
Den cuadro di diversificacion di nos turismo a anuncia siman pasa e vuelo directo for di Medellin cu aerolinea Wingo. Esaki sigur ta cuadra cu e maneho di Gobierno caminda ta keda habri rutanan nobo y aumenta e capasidad di asiento di esnan existente. Aruba su turismo a bin bek hopi fuerte despues di e pandemia, tur indicador ta mustra cu Aruba lo surpasa e 100% recuperacion di su turismo den comparacion cu aña 2019.
Por ultimo diabierna a tuma lugar e revelacion di e di #103 KLM Delfts Blue House. Aki KLM ta honra Aruba añadiendo e replica di nos monumento, esta cas di mayornan di Boy Ecury na e cas minaturanan di porcelano haciendo esaki e di 103 cas minatura. Durante vuelo KLM ta reparti mas di 800 mil cas minatura pa aña na nan miembronan, pasaheronan di business class y na pasaheronan cu a caba di casa of tin un aniversario. Locual KLM a haci ta mustra e laso fuerte cu e aerolinea tin cu Aruba y e lo sirbi como un mercadeo gratis pa pais Aruba.
Aruba su turismo ta keda resiliente y e driver principal di nos economia.
