Den transcuro di e siman di 7 di December venidero, e comicion encarga cu e destaho pa e refineria lo haci e anuncio final di nan trabao, unda nan lo mester informa cual te companianan potencial cu tin pa haci algo na e sitio di refineria. Sea ta un refineria of un otro industria.
Den ambos categoria tin companianan hopi intresa, y companianan cu tin propio capital pa inverti.
Parlamentario Endy Croes a declara e siman aki cu e noticianan cu ta circulando ta alentador. Tin lus na horizonte. Gobierno di Merca tambe ta intresa pa brinda nan yudansa den un forma of otro pa cu nan companianan dor di haci intermediacion of loke ta necesario.
E resultado final no ta conoci, pero pa otro siman lo bira conoci. Y no ta descarta cu un bon noticia por bini afor.
