Partido MEP ta expresa preocupacion grandi riba e declaracionnan di Mike Eman tocante aumento di cantidad di minister pa e siguiente gobernacion entre partidonan FUTURO y AVP.
Esaki pa Partido MEP ta un falta di consideracion hopi grandi di e gobierno entrante, na unda cu durante campaña pa eleccion 2024 ambos partido cu lo forma e gobierno nobo, a haci promesanan cu lo tin tur intencion di baha costo di gobernacion. Despues cu durante campaña nan a priminti cu nan lo goberna cu solamente siete minister, pa acomoda plan pa gobernacion di FUTURO y su Lider Gerlien Croes, e gobierno entrante a bin cu e desicion pa bin toch cu siete minister adicional pero a duna nan un otro nomber, esta “staatssecretarissen”.
Esaki ta haci cu FUTURO/AVP lo goberna cu 14 minister. Lo tin por ehempel, minister di educacion y su staatssecretaris/ vice minister di educacion, minister di finansas y su staatssecretaris/ vice minister di finansas. Sin duda esaki ta un intento pa evita yama nan como loke realmente nan ta: minister extra bou gasto di pueblo. Partido MEP ta considera esaki tambe como un engaño na e pueblo di Aruba.
Esaki lo pone un gran peso financiero riba nos pais. E siete posicionnan extra lo mester di salario, beneficio, staf, oficina, vehiculo, entre otro, cu lo costa miyones di florin anualmente. Contrario di nan promesa di campaña. En bes di reduci gasto di gobierno y priorisa stabilidad financiero manera MEP den gobierno a bin ta haci e ultimo siete añanan, nan ta expande e structura di gobierno y aumenta gasto, mientras cu nos pueblo ta sigui lucha cu costo haltu di bida y e debe cu Mike Eman a traha y e debe cu Hulanda cu Covid a causa.
Mas alarmante ainda ta cu e Mike Eman, a admiti abiertamente cu e posisionnan adicional ta pa train integrantenan incapas di Partido AVP pa haci nan capas pa bira minister di Partido AVP un dia. E realidad ta cu esaki ta e manera di Mike Eman pa acomoda mas tanto candidato riba su lista creando posicionnan y yamandonan staatssecretaris y no coordinador manera antes el a haci.
Gobernacion ta algo serio y Aruba no por permiti gasta miyonnan di florin solamente pa duna entrenamento politico na integrantenan di AVP bou gasto di e contribuyentenan na caha di gobierno. Si e gobierno nobo aki realmente ta comprometi na eficencia y reduccion di costo, lo nan no a bin cu e plan desastroso aki pero lo a keda firme riba su promesa original y lidera cu solamente siete minister manera nan mes a priminti—sin excusa, sin engaño.
Partido MEP ta condena fuertemente esaki como un desicion iresponsabel y engañoso. Pueblo di Aruba merece transparencia y un gobierno cu ta respeta su palabra. Nos lo sigui condena e decision di expancion iresponsabel innecesario aki di e gobierno entrante pasobra esaki ta pone un carga extra riba e ciudadano cu ta trahando duru.
