Cristo Hesus ta nos Sanador, e palabra di Dios ta bisa cu den su yaganan nos ta sana, esey a wordo demostra den milagernan cu te awe ainda ta tumando lugar den bida di hopi hende.
Senjor tey pa yuda, y tambe E a pone dokter y specialista pa yuda, pa asina hende por wordo alivia di nan malesa, of di nan problema of di nan depresion of adiccion.
Pero tin un otro banda cu ta di vital importancia, ta ora e persona mes ta desea di henter su curason pa tin un cambio den su bida, especialmente den su salud. Pasobra na e momento ey e palabra cu ta yama cooperacion ta bini fuertemente dilanti.
Hopi biaha tin hende ta den un situacion, cu hopi ta puntra dicon e persona no ta cambia, dicon e no ta laga los for di e situacion, of dicon e no por sali, for di e stiuacion, y hopi biaha ta resulta cu e persona no kier coopera ni tampoco abstene for di locual ta hacie malo.
Simplemente bisa e maligno ta hinca den su cabes, cu ora e ta malo e ta bon y ora e ta bon e ta malo, por ehempel ora e ta burachi of droga e ta persona great, pasobra su mente ta confundi entre malo y bon.
Namaan tabata un leproso, e a bishita e profeta Eliseo, y Eliseo a manda su cria bisa Namaan kende tabata un General di Ehercito, un homber rico, cu e mester bay banja siete biaha den riu Jordan.
Namaan a rabia masha ora cu e a tende cu esey ta e recept pa cura di su malesa.
Pero despues di varios conseho e a dicidi di bay banja 7 biaha den riu manera e profeta a bise y e a wordo cura completamente.
E yiu perdi ora e a realisa cu na cas di su tata hasta e sirbidornan ta biba mihor cune, e a dicidi di bay bek cas di su tata.
E a dicidi di coopera cu su mes, pasobra si un hende no kier coopera cu su mes, ningun otro hende por hacie pe.
Asina ta e a bolbe bek cas di su tata y tur hende sa kico a pasa , con su bida a wordo restaura.
Tin hopi hende ta husa e palabra “Willpower”, pero nan ta lubida cu tur hende cu somete nan “willpower” na Cristo Hesus nan bida ta wordo cambia, pasobra si bo keda para riba bo mes “willpower” nada no ta pasa, pasobra bo mes no por yuda bo mes.
Pesey e palabra di Dios ta bisa den Santiago 4:7 : Pesey somete boso mes na Dios, resisti e diabel y e lo huy for di boso, hala serca Dios y e lo hala serca boso.
Tur esnan cu entrega nan “willpower” na Cristo Hesus completamente , a wordo libera completamente, pasobra nan a dicidi pa rechasa locual ta haci nan danjo y acepta locual ta haci nan feliz.
Ayudo profesional ta di acepta, pero ayudo spiritual ta bini di ariba y e tin dominio riba tur cos.
Hesus a bisa su disipelnan cu tin spirito cu no ta sali si no ta pa medio di oracion.
Esey ta nifica cu sabiduria profesional ta bon, pero sabiduria di Dios ta exelente, y e ta surpasa tur sabiduria humano.
Awel laga nos tur aserca e trono di gracia di Dios, pasobra Dios ta fiel, y asina nos por hanja Su ayudo y sanacion na tempo.
Sinceramente, Pastor Marcel Balootje
