Durante reunion den Parlamento, Parlamentario Evelyn Wever-Croes a elabora riba e crisis di Venezuela, cu na e momento aki ta un guera den nos awanan teritorial. Loke ta pio ainda ta cu Gobierno no ta dunando ningun informacion riba esaki y Minister President, manera priminti, no ta yega Parlamento pa informa di e situacion y no ta duna aprobacion na Crisis Management Office (CMO) pa bin Parlamento y duna un presentacion.
Parlamentario Wever-Croes a expresa cu esaki sigur ta un situacion lamentabel, mirando cu pueblo mester wordo informa di kico en realidad ta pasando den nos awanan teritorial. El a indica cu e caracter di un lider di berdad, bo no ta mira den tempo di bonansa sino den temponan di crisis. Y mescos cu e tin su coalicion, na werki, pa motibo di falta di liderasgo, asina e tin e pais aki. E falta di liderasgo, di duna informacion cla, y di comunicacion transparente ta crea un bashi, y aki ta unda informacionnan falso ta yega pa yena e bashi.
Na momento cu un Gobierno no ta duna splicacion y/of informacion oficial, rumornan ta cuminsa, y hendenan ta asumi loke nan ta mira riba medionan social. Y esaki ta loke ta kibra e seguridad y confiansa di un ciudadano den su Gobierno. Pueblo por mira barco y avionnan di guera, pero niun informacion ta wordo duna na pueblo tocante esakinan. Minister President a priminti di yega Parlamento cada pasa un siman pa duna informacion riba e situacion di Venezuela, pero no a haci esaki. E aña aki, el a yega solamente 3 biaha pa duna informacion y cada biaha e informacion tabata limita.
E Minister President aki a scohe pa silencio, keriendo asina cu tur cos lo pasa bay. Pero e silencio aki no ta trece trankilidad den pueblo, sino ta duna mas preocupacion y desconfiansa. Esaki ta sin papia mes di su falta di lidersago pa pais Aruba.
Turismo ta e esencial pa pais Aruba, e ta e pilar economico di mas grandi. Na e momentonan aki, nos ta tende di e peligernan den nos espacionan aereo mescos cu Corsou. Na Corsou e ministernan a cuminsa exigi respet den nan espacio aéreo, mientras cu aki e ministernan ta balia, canta y sconde nan cabes den tera ora cosnan ta bira difícil.
“Pais Aruba merece miho. Nos merece lidersago fuerte mescos cu nos a conoce durante e pandemia mundial di mas grandi” Parlamentario Wever-Croes a expresa.
