Minister Endy Croes:
ORANJESTAD: Prome cu aña a termina Minister Endy Croes a reuni cu funcionarionan di Universidad di Aruba presente na e ocasion tabata presidente di Colegio di Curator di UA, sr. Herry Koolman, vice-presidente sr. Angelo Brete, rector di Universidad di Aruba, dr. Viola Heutger y Business Director di e instituto sr. Patrick Arens. Durante e reunion, sr. Herry Koolman y dr. Viola Heutger a duna splicacion amplio ne madatario di proceso y proceduranan pa cu nombracion di docentenan di Universidad di Aruba y e rol cu Minister di Enseñansa tin den esaki.
Tambe a informa Minster Endy Croes cu e proceso pa institutionalisa un ‘Leerstoel’ pa rector di Universidad ta completa. Despues di aprobacion di e mandatario, pa prome biaha den historia di Universidad di Aruba, e rector ta carga e titulo di ‘Hoogleraar’. E ‘leerstoel’ ta encera cu Rector dr. Heutger lo inicia, coordina y lidera investigacionnan riba e tereno di idioma den enseñansa na Aruba y den region. Minister Endy Croes a indica cu investigacionnan riba tereno di idioma ta di interes, door cu tin varios punto di bista diferente riba tereno di maneho di idioma na Aruba y intencion di e mandatario ta pa delinea un maneho concrecto y efectivo. Pa por haci esaki Ministerio di Enseñansa mester di conseho y apoyo pa medio di resultadonan di investigacion cientifico.
Durante e reunion a elabora riba e ‘tweede-graads opleiding Wiskunde’ cu Universidad di Aruba a organisa na aña 2014 di cual 33 studiante a gradua te cu awor. Universidad di Aruba actualmente ta den combersacion cu IPA, University of Curaçao y dos otro unversidad Hulandes pa sondea posibel colaboracion y determina si por inicia un ‘Master-opleiding Wiskunde’ na Aruba. ‘Mi ta contento di tende cu tin interes for di Curaçao pa e programa aki’, e madatario a expresa.
Minister Endy Croes a sigui bisa cu e ta masha contento cu e interes di Universidad di Aruba pa tin encuentronan structural cu Ministerio di Enseñansa, pa asina intercambia opinion pero tambe pa por ricibi conseho di nos instituto nacional pa cu maneho di enseñansa na Aruba.
