Despues di nuebe dia di oracion, reflexion, alabansa, rosario bibo y ofrecimento di bela pa demostra nos aprecio na mama Maria, Fundacion Venerable José Gregorio Hernández a celebra e di 157 aniversario di e natalicio di e Beato Venezolano. Cu e rosario bibo cu a tene e di shete dia na honor di tur dokter, a forma un bunita rosario y cada misterio tabata di un otro color di bela. Hopi luz a pidi pa e dokter di pobernan, tur dokter na Aruba y esnan cu ta traha den salubridad.
Dia 26 di october, cu tabata e fiesta oficial di nos beato, nos tabata tin un santo sacrificio di misa na Sitio di Oracion presidi pa vicario pastoor Andres y reverendo diacono Gilbert.
Na un forma cu tabata di aprecia a repasa e biografia di e gran dokter, José Gregorio Hernández, kende na april ultimo a ser proclama Beato door di Papa Francisco.
Musica tabata na encargo di Ministerio di Musica “El Señor es nuestra alegría” cu canto na estilo Venezolano.
Tabata un santa eucarestia bon concuri pa grandi y chikito y tur presente a keda hopi contento cu e regalo bendiciona door di vicario como recuerdo di e prome nobena na honor di beato, sigui pa un treat chikito. Tambe por a aprecia Diego Alexander Londoño, cu ta un devoto infantil di beato José Gregorio Hernández, kende ta gusta imita su vestuario na varios ocasion y celebracion.
Cu esaki Fundacion Venerable José Gregorio Hernández ta desea di gradici tur fiel, cu a haci donacion di comestibel, pa asina nos por sigui yuda esnan di menos recurso den comunidad. Tambe ta gradici tur otro persona cu a yuda cu un donacion di un otro forma. Masha masha danki!
FUNDACION VENERABLE JOSE GREGORIO HERNANDEZ TANKI LEENDERT 128
