Dios ta duna nos un seguridad den su palabra, cu mundo no por ofrece nos bisando;
No tene miedo pasobra Mi ta cu bo.
No desmaya pasobra Mi ta bo Dios.
Lo Mi fortalese bo,si, lo Mi yuda bo.
Si, lo Mi sostene bo cu mi man drechi di husticia.(Isaias 41:10).
Pasobra Ami ta Senjor bo Dios.
Kende ta sostene bo man drechi.
Kende ta bisa bo ; No tene miedo , lo Mi yuda bo.( Isaias 41:13).
Pa nan mira, reconoce, considera y comprende tambe, cu e man di Senjor a haci esaki,y Esun Santo di Israel a crea esaki.( Isaias 41:20).
Hesus Cristo ta mescos ayera y awe y pa semper (Hebreonan 13:8).
Bin serca Mi tur cu ta cansa y carga y lo Mi duna boso sosiego.(Mateo 11;28).
Ora anja ta bay caba, y otro anja ta bay cuminsa, nos tin e mihor deseonan un pa otro.
Semper nos kier tin seguridad pa e anja benidero y nos ta declara cu e lo ta miho cu esun cu ta cabando.
Pero dia cu tempo a demostra cu no tin nada cu nos por pone nos confiansa den dje riba e mundo aki cu no ta tambalia.
Y ta pesey nos mester busca Senjor pa nos tene na dje tur momento y cu tur momento ta mesun cos, y esey ta Hesus Cristo nos Senjor.
Ta solamente Dios por duna nos e seguridad cu e lo ta cu nos tur momento, pa nos no tene miedo, pero pa nos para firme sabiendo cu esun cu ta sostene nos bida, nos cas y nos famia, ta e Todopoderoso.
Esaki no ta algo di awor pero ta algo cu wordo proclama miles di anja pasa, y nos mester corda cu cielo y tera por pasa, ma e palabra di Dios lo no pasa, Dios semper tey pa nos.
Y mesun cos cu Dios a priminti nos, Su Yiu Cristo Hesus ta confirma na nos;
Ami ta e caminda, y e berdad, y e bida,ni un hende no ta bin serca e Tata, sino pa medio di Mi.( Juan 14:6).
Ami ta e mata di wijndruif,boso ta e ramanan,esun cu keda den Mi,y Ami den dje,esey lo duna hopi fruta,pasobra separa di Mi boso no por haci nada.( Juan 14:5).
Ken cu tende e palabranan aki di Mi y haci nan, lo wordo compara , cu un homber sabi,cu a
traha su cas riba baranca.( Mateo 7:21).
No tin ningun profecia cu hende por trece den e tempo di awor cu no ta basa for di e base aki cual ta e palabra di Dios, hopi biaha nos ta tende hende bisa cu asina Senjor ta bisa, pero locual Senjor a bisa for di principio no ta cambia.
Tur locual ta para scirbi ta garantia y seguridad pa nos bida , te na binida di Cristo Hesus, tur locual nos ta lesa ta pa nos hiba un bida victorioso den Cristo Hesus, pasobra den dj’E nos tin tur cos.
Pasobra manera ta para scirbi den Mateo 11:27: Hesus a bisa: Tur cos a wordo entrega na Mi door di Mi Tata.
Ta tempo pa tur hende reconoce, cu no tin ningun otro caminda pa salbacion,cu no ta pa medio di Cristo, esun cu kere den Cristo lo ta salba y esun cu no kere lo ta condena (Juan 3:16-19).
Esaki ta e berdad cu ta pone hende sera anja den victoria y habri anja den victoria, pasobra tur locual cu nos mester ta e gracia di Dios riba nos bida y famia.
Sinceramente, Pastor Marcel Balootje
