Prome Minister Evelyn Wever-Croes:

“Den union y cu hopi positivismo nos lo sigui traha pa recupera completamente di e consecuencianan devastador di e pandemia”

ORANJESTAD – Dialuna mainta tempran, e prome barco a yega for di Venezuela cu un cargacion di fruta, berdura y diferente otro mercancia. Frontera cu Venezuela a habri desde 1 di Mei 2023 habriendo e posibilidad  di por importa fruta y berdura y otro mercancianan na prijsnan hopi mas barata for di Venezuela yudando asina pa rebaha costo di bida. 

E capitan di e barco Gaviota a indica cu a tuma nan 6 ora y mei pa yega Aruba saliendo for di Venezuela den oranan laat di anochi. Nan a trece mas o menos 50 tonelada di diferente fruta y berdura. Y lo trata pa bin Aruba un biaha pa siman. Capitan di El Maracucho tambe a indica cu nan a sali for di Venezuela den oranan di anochi y a yega Aruba pa 6or di mainta. El a indica cu autoridadnan na Aruba, tanto inmigracion como aduane tawata hopi atento y cordial cu nan. El Maracucho a trece casi 35 tonelada di mercancia varia.

Na yegada di e barconan, tambe tawata presente comerciantenan pa ricibi nan mercancia. Propietarionan di Al Jazar Trading N.V. y Fruteria Frangie a expresa cu nan ta sumamente contento di a ricibi 40 tonelada di mercancia y a duna di conoce cu awo lo e prijs di e productonan lo bira mas economico pa tanto ciudadanonan di pueblo di Aruba como pa restuarantnan ya cu nan no mester paga pa container mas di productonan cu tawata bin for di Colombia. Prioridad ta e prijs cu lo baha, nan a remarca. 

Prome Minister Evelyn Wever-Croes: “Apesar cu e proceso aki a dura un poco largo, Gobierno di Aruba ta contento cu e prome barconan cu mercancianan a cuminsa drenta Aruba pa asina por cuminsa importa fruta y berdura, comestibel, material di construccion, entre otro, na prijsnan mas barata cu nos ta hayando actualmento cu lo por yuda cu e peso di costo di bida halto na Aruba. Den union y cu hopi positivismo nos lo sigui traha pa recupera completamente di e consecuencianan devastador di e pandemia. Aruba ta den recuperacion y cu e frontera maritimo habri, prijsnan di productonan for di Venezuela lo baha considerablemente. Pabien Aruba”. 

LEAVE A REPLY

Please enter your comment!
Please enter your name here