Awe mainta Hues di Corte den Promer Instancia, a dicta sentencia den e caso penal cu Ministerio Publico a cuminsa contra e homber Venezolano G. (24) biba na Aruba. Den sala di Corte tabata presente e mama di e victima, e dama J.
SOLO DI PUEBLO por a compronde cu algun siman pasa, Fiscal a exigi 4 aña di prison y awor Hues a condena G. na 3 aña di prison.
FISCAL A EXIGI 4 AÑA
Durante tratamento di e caso riba 5 di Maart 2025, Fiscal a acusa G., di a abusa di e mucha E. riba 6 Mei 2024. Tambe Fiscal a acusa G., cu subsidiario, G. a haci actonan inmoral cu e mucha.
Fiscal ta haya cu G. a abusa di su posecion como padastro di e mucha. Fiscal a exigi 4 aña di prison pa G.
Riba e asunto di demanda di daño, Fiscal ta haya cu den e demanda no tin splicacion cla kico e demanda material ta. Fiscal a pidi Hues pa declara esaki no admisibel. Pa loke ta e daño inmaterial, Fiscal ta haya cu e mucha E. a keda afecta y cu mester haya tratamento di psycologo. E ta haya cu por aproba 5 mil florin pa daño inmaterial. Fiscal a exigi tambe, pa Hues impone medida di pago contra G. Fiscal a bisa cu e mama di e mucha por cuminsa un caso civil contra G. si e ta desea esey.
HUES A BAHA CASTIGO
Awe mainta Hues a bisa cu e ta haya G. culpabel di a abusa di mucha E. (15) cu ta yiu di G. su pareha, e dama J.
Hues a mustra cu e mucha E. a duna declaracion amplio y ta wordo confirma pa su ruman homber. Ademas a haya DNA di G. riba carson di e mucha E.
Hues a bisa, cu e no ta kere e defensa di abogado cu lo tabatin un set up di parti di e mama di e mucha contra G. Hues a rechaza esaki. Hues a sigui bisa cu e no ta kere declaracion di G. cu e no a haci nada.
Hues a sigui bisa cu e acusado G. a tacha integridad di e mucha. Hues ta haya cu G. a abusa di e confianza cu e mucha mester tin den su padastro.
Pa loke ta e demanda di daño, Hues a aproba e exigencia di Fiscal, esta 5 mil florin y a declara e resto di demanda di daño no admisibel.
Hues a condena G. na 3 aña di prison, kitando e tempo cu G. ta sera den KIA. Tambe Hues a pone medida di pago pa G. paga e daño inmaterial.
