Durante e periodo di gobernacion di Gabinete Mike Eman di 2010 pa 2017 Aruba a conoce e gobierno di mas malo den su historia. Gabinete Eman a hiba un maneho financiero desastroso creando deficitnan astronomico y cu a hiba gobierno na un Aanwijzing y KB na 2014. 

Hecho ta cu te ainda ningun hende por saca afo pakico Gabinete Eman mester a endeuda e pais di e forma drastico y cruel aki, ya cu na nan yegada den gobierno nan a hereda 970 miyon florin cu Gabinete Oduber a laga atras na final di 2009. Alavez no tabatin ningun necesidad pa crece nos debe nacional barbaramente ya durante e periodo ey NO tabatin pandemia ni crisis financiero mundial ni prijsnan astronomico di petroleo y gasolin!

Deficitnan 2010-2014

Deficitnan na 2010 di 188.6 mln, 2011: 325.2 mln, 2012: 443.3 mln, 2013: 332.8 mln y 2014: 405.8 mln. Den total 1.7 Biyon florin extra na nos debe nacional den apenas 5 aña.

E resultado di e maneho financiero desastroso y di e Megadebe tabata un Aanwijzing y KB implementa riba Gabinete Mike Eman dia 11 juli 2014 y cual a conduci tambe na entrada di Comision di Supervision Financiero CAFT pa Aruba na mei 2015. Siguramente esaki tabata un traicion imperdonabel di nos autonomia financiero cometi pa Mike Eman y su partido AVP.

Deficitnan 2020-2023

Deficitnan na 2020 di 1028.8 mln, 2021: 585 mln, 2022: 148.2 mln y 2023: 25 mln.

Gabinete Evelyn Wever Croes – despues di a logra un surplus di 4 miyon florin na 2019 – di dia pa anochi a ser confronta na maart 2020 cu un pandemia devastador y cu a ruina nos economia y finansas publico dramaticamente. Logicamente e pandemia a trece cune cu e deficit na 2020 a crece grandemente, sinembargo esaki a reduci drasticamente na 2021 y 2022 y lo sigui reduci na 2023 y e añanan siguiente. Hecho ta cu Aruba tabata e pais mas afecta na mundo, caminda e entradanan di gobierno a cay cu 834 miyon florin den 3 aña sigui. 

Mas reto pa e gobierno actual

Tur esaki mientras cu te ainda nos ta cosechando e efectonan negativo di e guera di Rusia y Ucraina cu inflacion dramatico y prijsnan di crudo nunca visto. Y no mester lubida cu desde 2018 e gobierno actual a haya su mes ta paga pa e proyectonan PPP pa un suma di 85 miyon florin pa aña y durante 30 aña largo y tambe e 253 miyon florin na pago di interes riba nos Megadebe causa grandemente pa e locura di Mike Eman y su partido AVP.

Ta p’esey partido MEP ta condena e forma con partidonan politico di oposicion ultimamente ta crea panico innecesario den pueblo bisando cu e gobierno actual lo haya un Aanwijzing y KB. E cifranan di deficit ta papia pa nan mes caminda tur hende mes por mira e diferencia di e deficitnan crea durante Gabinete Eman sin cu tabatin un pandemia y e deficitnan crea durante Gabinete Wever Croes cu un pandemia devastador cu a afecta tur hende den e comunidad aki, incluso nos opositornan. Pues ban bolbe bek na realidad y hunto traha pa progreso di e pais aki.

LEAVE A REPLY

Please enter your comment!
Please enter your name here