E uso di alcohol ta y ta keda alarmante, e ta un dolor publico. social, familiar, cu ta incomprendibel con hende mes ta permiti alcohol domina nan bida di un forma cruel, cu ta parce manera nan no tin resistencia.
Pa hopi tempo caba alcohol, no tin edad, grandi y chikito ta bebe, pero locual ta mas tristo ta cu alcohol a cay den gara di mucha, si den man di mucha, muchanan cu ta bebe mescos cu hende grandi, y nos tur sa cu alcohol y estudio, no ta bay bon at all cu otro.
Si un mucha for di awor cu e ta chikito ta bebe, for di awor cu e ta bay scol, kico lo para ora e mucha aki bira grandi y bay biba por ehempel na Hulanda of cualkier otro pais riba su mes pa studia, ken lo por para e uso drastico di alcohol.
Pa basta tempo caba uso di alcohol a bira un problema pa trafico, hende ta bebe burachi y contra tur regla y contra tur ley nan kier stuur y mayoria biaha ta causa accidente.
Buracheria a causa morto hopi biaha, sin conta tur esnan cu ta invalido, of a keda perhudica fisicamente pa motibo di buracheria den trafico.Ta ken ta manda hende?
Buracheria a destrui hopi famia, y hasta tin hopi famia riba caminda di destruccion, pa motibo di alcohol, pasobra antes bo ta tende di Papai ta burachi, awor aki ta asunto di Papai , Mamay y yiu ta burachi den cas y ningun di nan por rasona.
Matrimonio ta na werki, yuinan no tin supervision, no tin respet den cas, gastonan social no ta wordo cubri, no ta pasobra no tin placa, pero pasobra e placa ta wordo gasta malamente na alcohol, te asina leu cu hende no por paga nan awa y nan luz.
Relacion matrimonial no ta wordo respeta door di alcohol, pasobra alcohol na prome lugar ta pone hende perde respet pa nan mes, tene cuenta cu un homber burachi ta hopi biaha un cos di hari, pero ora ta trata di un muher burachi ta algo tristo.
Pasobra nos tin di corda cu muher ta nos mama, y semper bay mester tin respet pa hende muher, y awor nos ta bibando den un tempo cu hopi hende muher ta victima di alcohol, tin algun ta bisa cu nan ta bebe, pa motibo di cierto cosnan cu nan kier lubida, pero tin ta bebe diariamente pasobra nan mes kier bebe.
Alcohol no ta pone hende lubida,simplemente esey ta un gran mentira di diabel, pasobra e ta funciona mescos cu droga, ora e perde su efecto den bo mente, bo ta bay den mesun estado bek.
Tin hopi hende cu nan dokter a bisa nan pa no bebe, cu nan bida ta na peliger , pasobra cierto organo no ta funciona optimal, pero contra tur conseho di dokter nan ta sigi bebe.
Tin hopi hende ta bebe scondi, bao di ora di trabao, hendenan cu responsabilidad grandi,hendenan cu mester cuida bida di otro hende, pero nan ta laga alcohol domina, y tin hasta a perde nan trabao pa motibo di alcohol.
Alcohol y perversidad ta cana hunto, pesey ora hende ta burachi tur sorto di palabra malo y perversidad ta sali for di nan boca,tur sorto di baile y actuacion indecente y bagamunderia ta wordo practica, pasobra ora hende ta burachi un scuridad diabolico ta tuma over su mente.
Proverbionan 23:29-35 ta bisa hopi cla kico alcohol por haci cu hende.
Alcohol ta un enganjo grandi, y ta tempo pa hende bira consciente.
Sinceramente, Pastor Marcel Balootje
