Den Bijbel Genesis 3: 14-16, Dios Tata a bisa na e colebra satanas: “Lo Mi trece enemistad entre abo y e muher, entre bo descendiente y entre e descendiente di e muher. E muher cu su descendiente lo trapa riba bo cabes y lo bo lastra bao di su pia.” Akinan e muher ta Maria, cu a obedece Dios y a acepta di ser Mama di E Salbador. Maria Su descendiente ta, Cristo-Hesus y tur e sigidornan den Cristo-Hesus Su Iglesia. E descendiente di e colebra satanas ta esnan den secta cu no ta acepta Maria y ta persigi Cristo-Hesus Su Iglesia. Den Bijbel Revelacion 12: 17: “Anto e dragon a rabia contra e muher y e’l a bai hasi guera na e demas yiunan di e muher.” Akinan e diabel tin rabia riba Maria y e diabel ta persigi y ataka e yiunan di Maria den e Iglesia di Cristo-Hesus. Den Bijbel Lucas 1: 41-43, akinan Maria a bishita Su prima Elizabeth y Elizabeth a keda yena cu Spirito Santo y a bisa: “Di unda mi ta merese e honor cu Mama di mi Senjor ta bishita mi?” P’esey Maria ta wordo yama Mama di Dios, pasobra Su Yiu Hesus ta E di dos Persona di E Santisima Trinidad. Y den Bijbel Huan 20: 28, akinan Apostel Thomas ta expresa na Hesus: “Mi Senjor y Mi Dios.” Akinan e palabra Senjor ta significa Dios, pesey Maria ta Mama di Dios. Den Bijbel Huan 19: 25-27, akinan Hesus na Crus klaba a bisa: “Mama, ata bo yiu eynan y despues E’l a bisa Huan: Ata bo Mama eynan.” Akinan Hesus ta ofrece nos Su Mama Maria, pa nos stimel’E, pa nos honrel’E y pa nos acepta Maria como nos Mama. Manera cu e Apostel Huan a acepta Maria como su Mama y e Apostel Huan ta representa e Iglesia di Cristo-Hesus, pesey Maria ta Mama di Iglesia. Den Bijbel Revelacion 12: 1, ta bisa: “Un senjal grandi a aparece na Cielo: un Muher bisti cu solo, cu luna bao di su pianan y riba su cabes un corona di diesdos strea.” E Muher bisti di solo ta Maria y e corona di diesdos strea ta simbolisa, e oficio Real den Reino di Cielo. E significacion di solo, luna y streanan, den Bijbel Genesis 37: 9-11, akinan e Profeta Jozef ta sonja di mira con, solo, luna y streanan ta buig su dilanti y esaki ta simbolisa, Reinado y Autoridad. Den Bijbel 1 Reynan 2: 19-20, ta bisa: “Ora cu Betsabe, e mama di Rey Salomon a drenta den e sala di e Rey, pa papia cun’e ariba asunto di Adonias, e Rey a lanta pa ricibi su mama y a buig su dilanti. Despues e’l a bai sinta riba su trono y a duna ordo pa nan trece un stoel di trono pa su mama, e mama a sinta na man drechi di su yiu Rey Salomon y a bis’e: Mi kier a pidi bo un fabor chikito, mi no ta spera cu bo lo nenga mi. Rey Salomon a contesta: Mi mama, pidi mi loke bo kier, lo mi no nenga bo.” Akinan e mama di Rey Salomon a haya un trono, pa sinta na man drechi di su yiu Rey. Tambe Betsabe a pidi su yiu Rey Salomon fabornan pa Adonias y Rey Salomon a contesta su mama: “Mi mama, pidi mi loke bo kier, lo mi no nenga bo.” Akinan Betsabe tabata abogada y intercesora pa Adonias y pa otronan. Akinan tambe Maria a intercede, pa e pareha recien casa na boda di Cana na Galilea na unda cu binja a caba, Bijbel Huan 2: 1-10. Mama Maria den Cielo ta nos abogada y intercesora pa tur Su yiunan den Iglesia di Su Yiu Hesus y Hesus Rey di Universo, lo no nenga Su Mama fabornan. Conclusion: Na ora di nos morto, nos tur tin cu presenta individualmente dilanti di tribunal den Cielo pa ser husga, dilanti di trono di Hesus Rey di Universo. Awor, na esnan den secta cu no a acepta Maria, ta ken bo ta kere di mira tambe sinta na Su Trono na man drechi di Rey Hesus? Wel, lo bo mira Maria sinta na Su Trono, como Reina di Cielo y di Tera, bisti cu Solo, Luna bao di Su pianan y riba Su Cabes un Corona di diesdos Strea. E prome palabra cu Hesus Rey di Universo lo bisa bo ta, bo a honra Mi Mama, bo a venera Mi Mama y bo a stima Mi Mama, manera Mi ta stimel’E? Tambe Hesus lo bisa bo, Mi a ofrece bo Mi Mama, den agonia na Crus claba, lesa Bijbel Huan 19: 25-27. Nunca no ta laat pa sa e berdad y pa cambia bida.
Scirbi pa Seferino Tromp
